Beynəlxalq iqlim alimləri qrupu, son onilliyin əvvəlində Afrika meşələrinin biokütlə böyüməsini və istixana qazlarını udmağı dayandırdığını, bunun əvəzinə geniş yayılmış meşələrin qırılması səbəbindən istixana qazları emissiyalarının ən böyük mənbələrindən birinə çevrildiyini göstərən ilk sübutları aşkar edib.

Newscenter.az TASS-a istinadən bildirir ki, bu barədə Böyük Britaniyanın Lester Universitetinin mətbuat xidməti məlumat yayıb.

Bildirilir ki, bu kəşf beynəlxalq iqlim gündəmi üçün mühüm siqnal olmalıdır. Əgər Afrika meşələri karbonu udmağı dayandırıbsa, bu o deməkdir ki, dünyanın digər regionları temperaturun 2 dərəcə Selsiyə qədər yüksəlməsini saxlamaq və fəlakətli iqlim dəyişikliyindən qaçmaq üçün emissiyaları daha da azaltmalıdırlar.

Qeyd edək ki, Afrika meşələri təxminən 640-840 milyon hektar ərazini əhatə edir və onların biokütləsi 85 milyard tondan çox karbon ehtiyatı saxlayır. Afrikanın son onilliklərdə artan əhalisi, geniş yayılmış meşələrin qırılması ilə birlikdə, iqlim alimlərini Afrika meşələri tərəfindən nə qədər karbonun udulduğunu və istehsal edildiyini yaxından araşdırmağa sövq edib.

Tədqiqatçıların fikrincə, bu itkilər əsasən Afrikanın tropik bölgələrində, o cümlədən Madaqaskar, Konqo Demokratik Respublikası və Qərbi Afrika ölkələrində cəmləşib. Ümumilikdə Afrika meşələri CO2 tullantılarından istixana qazı emissiyalarının əsas mənbələrinə çevrilib.

Şeyda