28 noyabr 2025-ci il tarixində Gəncə şəhəri Nizami Gəncəvi Muzeyində “Azərbaycan-Türk bədii təfəkkürünün zirvəsi – Nizami Gəncəvi” mövzusunda elmi-praktiki konfrans təşkil olunub.

Newscenter.az xəbər verir ki, tədbir Gəncə Şəhər İcra Hakimiyyəti və Gəncə-Daşkəsən Regional Mədəniyyət İdarəsinin birgə təşkilatçılığı ilə baş tutub.

Konfrans iştirakçıları əvvəlcə Nizami Gəncəvinin məqbərəsini ziyarət edib, muzey sərgilərinə baxış keçirib və “Günəş” rəqs qrupunun təqdimatını izləyiblər. Daha sonra muzeyin konfrans zalında Azərbaycan Respublikasının Dövlət himni səsləndirilib, Ulu Öndər Heydər Əliyev və Şəhidlərin xatirəsi anılıb.

Tədbirdə Nizami Gəncəvinin irsi, Azərbaycan və Türk dünyasında rolu, mədəniyyət və turizm sahəsinə təsiri mövzularında çıxışlar səsləndirilib. Vurğulanıb ki, dahi şairin əsərləri xalqımızın mənəviyyatının ayrılmaz hissəsidir və gənc nəsillərin tərbiyəsində böyük rol oynayır.

Tədbirdə fəal iştirak etdiyinə görə bir neçə şəxsə Gəncə-Daşkəsən Regional Mədəniyyət İdarəsinin rəisi Nail Məmmədov tərəfindən təşəkkürnamə təqdim edilib. Tədbirin bədii hissəsində Gəncə Şəhər Uşaq İncəsənət Məktəbi və Gəncə şəhər Bülbül adına 3 nömrəli uşaq musiqi məktəbinin kollektivləri Nizami Gəncəvinin əsərlərindən ibarət proqramla çıxış ediblər





Süleyman