Newscenter.az.14.10.2021. Abşeron rayonunun Saray qəsəbəsində kəşfiyyatçı şəhid Salmanov Azər Vəfadar oğlunun xatirəsini əbədiləşdirmək məqsədi ilə inşa edilən abidə-bulaq kompleksinin açılışı olub. Newscenter.az xəbər verir ki, açılış mərasimində Abşeron rayon İcra Hakimiyyətinin başçısı İradə Gülməmmədova, Milli Məclisin deputatı Şahin Seyidzadə, rayonun hüquq-mühafizə orqanlarının rəhbərləri, şəhidin ailə üzvləri, döyüş yoldaşları, rayon ictimaiyyətinin nümayəndələri iştirak edib.

Çıxış edən şəhidin döyüş yoldaşları, oxuduğu məktəbin kollektivi və rayon ağsaqqalları şəhidin həyatından və döyüş yolundan, onunla bağlı xatirələrdən danışıb, gənc nəslin vətənpərvərlik ruhunda tərbiyə olunmasında Vətən Müharibəsi şəhidlərinin irsinin öyrənilməsinin vacibliyini qeyd ediblər.

Qeyd edək ki, Azər Salmanov Qubadlı istiqamətində gedən döyüşlərdə qəhrəmancasına şəhid olub, Azərbaycan Respublikası Prezidenti İlham Əliyevin müvafiq Sərəncamları ilə "Vətən uğrunda, “Cəbrayıl azad olunmasına görə”, “Qubadlının azad olunmasına görə” və Cəsur döyüşçü" medalları ilə təltif edilib.

Bütün şəhidlərimizin ruhu qarşısında baş əyirik!

Allah bütün şəhidlərimizə rəhmət eləsin!

NEWSCENTER.AZ