Newscenter.az.23.11.2021. Misirdəki diaspor mərkəzindəki kursların müdavimi Fatima Şakir “Asia Əl Yom”, “Əl Hərir” və digər KİV-də “Azərbaycanlı şəhid Mübariz İbrahimovun həyatında nur” sərlövhəli məqalə ilə çıxış edib.

AZƏRTAC xəbər verir ki, məqalədə Azərbaycan tarixinə bələd olan hər kəsin bu ölkənin oğullarının yazdıqları qəhrəmanlıq dastanına heyran olduğu qeyd edilib. F.Şakir yazıb: “Vətən hər bir insan üçün əzizdir və hər bir vətəndaş onun uğrunda həyatını qurban verməyə hazır olmalıdır. Rəşadətli Azərbaycan Ordusunun əsgərləri sırasında qəhrəman Mübariz İbrahimovun igidliyi diqqətimi çəkdi. Onun haqqında düşüncələrimi ərəbdilli oxucularla bölüşmək istədim”.

Milli Qəhrəman Mübariz İbrahimovun həyatı haqqında məlumat verən müəllif vurğulayıb ki, o, yaşının az olmasına rəğmən, öz intellekti və igidliyi sayəsində hərbi xidmətdə fərqlənə bilib. O yazıb: “Bir dəfə gecə vaxtı, 2010-cu il iyunun 12-də qəhrəman əsgər Ermənistanın işğal etdiyi və minaladığı ərazilərdən keçərək düşmənə hücum edib. Təxminən 5 saata yaxın davam edən atışma zamanı 100 erməni əsgərini məhv edə bilib. Dan yeri söküləndə isə qəhrəman döyüşçü şəhid olub. Onun həlak olduğu yerdə tapılan ölümqabağı məktubu çox təsirlidir: "Canım, atam və anam. Məndən sarı darıxmayın. İnşallah, cənnətdə görüşəcəyik. Mənim üçün bol-bol dua edin. Vətənin dar günündə artıq ürəyim dözmür. Allaha xatir bunu etməliyəm. Ən azından ürəyim sərinlik tapar. Şəhid olanadək bu şərəfsizlərin üzərinə gedəcəyəm. Şəhid olsam - ağlamayın. Əksinə, sevinin ki, o mərtəbəyə yüksəldim. Allaha ibadətlərinizi dəqiq yerinə yetirin. Çoxlu sədəqə verin. Seyid nəvəsi olaraq bunu etməliyəm. Allah böyükdür. Vətən sağ olsun. Oğlunuz Mübariz. Haqqınızı halal edin".

Məqalədə qeyd olunub: “Azərbaycanın təkidli tələbindən iki ay sonra şəhidin cənazəsini qaytaran ermənilər qorxularından onun əllərini də bağlayıblar. Düşmən onun meyitindən də qorxub. İgidliyi dillərdə dastan olan əsgər Azərbaycanın Milli Qəhrəmanı adına layiq görülüb, Müdafiə Nazirliyinin qarşısında isə onun abidəsi qoyulub. Canını əziz Vətəni uğrunda fəda edən Mübariz İbrahimovun xatirəsi qəlblərdə əbədi yaşayacaq”.