Newscenter.az.25.12.2021. Dekabrın 25-də Sumqayıt Dövlət Universiteti (SDU) ilə Azərbaycan Texniki Universiteti (AzTU) arasında əməkdaşlıq haqqında memorandum imzalanıb.

Newscenter.az xəbər verir ki, görüşdə SDU-nun rektoru, professor Elxan Hüseynov, AzTU-nun rektoru, professor Vilayət Vəliyev, hər iki ali təhsil müəssisəsinin prorektor və dekanlarından ibarət nümayəndə heyəti iştirak edib.

Rektor Elxan Hüseynov AzTU ilə əməkdaşlığın genişlənməsindən məmnunluğunu ifadə edib. O, Azərbaycan Prezidenti İlham Əliyevin elmin və təhsilin inkişafına göstərdiyi diqqət və qayğıdan söz açıb. Rektor rəhbərlik etdiyi ali təhsil müəssisəsinin fəaliyyəti, buradakı təhsil, tədris prosesi və əldə olunan nailiyyətlər barədə ətraflı məlumat verib.

AzTU-nun rektoru Vilayət Vəliyev səmimi qarşılanmaya görə SDU-nun rektoru Elxan Hüseynova təşəkkürünü bildirib. Rektor rəhbərlik etdiyi ali təhsil müəssisəsində son illər görülən işlər və həyata keçirilən layihələr barədə məlumat verib. Qeyd edib ki,universitetlər arasında imzalanacaq memorandum əməkdaşlığın genişlənməsi ilə yanaşı, elmin və təhsilin inkişafına böyük təkan verəcək.

Daha sonra hər iki ali təhsil müəssisəsi arasında əməkdaşlıq haqqında memorandum imzalanıb.

Sənədə əsasən, tərəflər təhsil və elm sahəsində əməkdaşlıq edəcək, həmçinin təcrübə mübadiləsi aparacaqlar.

R.Mehdiyeva