Newscenter.az.2.01.2022. Dostlar, 1 aydır bu sualı özümə verirəm, amma cavab tapa bilmirəm. Xahiş edirəm siz deyin: Bakı Nəqliyyat Agentliyi cərimə maşınıdır, ya hökumət qurumudur?!

Deməli, 28 may metrosu rayonunda 1-2 km radiusunda harda maşın saxlasan, cərimə edirlər. İstəyirsən, qadağan olunmuş yerdə - piyada keçidinin üstündə , istəyirsən qadağan olunmamış yerdə - həyətdə saxla, fərqi yoxdur, BNA-nın maşını gəzir və cərimə göndərir. Məni keçən həftə, 02-01-2022 tarixdıə yenə cərimə etdilər. Amma maşını hər dəfə qadağan olunmamış yerdə, yoldan və piyada keçidindən xeyli aralı saxlayıram.

Yeri gəlmişkən, bir jurnalist kimi bu özbaşınalığın mümkün səbəblərini də araşdırdım. Deməli, “28 May” metro-stansiyasının qarşısında BNA-nın pullu avtomobil dayanacağı var. Saata az qala 2 manat istəyirlər. BNA da kənarda saxlayan maşınları cərimə edir ki, hamı saatına 2 manat ödəyib maşınını onun pullu dayanacağında saxlasın. Yadınızdadırsa, bu metoddan bir vaxtlar Hacıbala Abutalıbov istifadə edirdi. Bakıda onun aparatlarına pul ödəməyən bütün şəxsi maşınları, harda saxlamağından asılı olmayaraq, evakuator götürüb gedirdi...

Və son olaraq. Yaxşı yadımdadır, 90-cı illərdə, 8-ci km-də bizim həyətdə böyük bir maşın dayanacağı (indi yerində bir neçə bina tikilib) vardı. Məlum kriminal avtoritet Söhbətə məxsus olduğunu deyirdilər. Hamı maşınını bu dayanacaqda saxlamalı idi. Kim ki, həyətdə, küçədə saxlayırdı, gecələr ya təkərini deşirdilər, ya da maşınını cızırdılar. Camaat məcbur idi ki, gecəsi 1 rubldan maşınını Söhbətib dayanacağında saxlasın...

Deyəsən, tarix təkrar olunur, dostlar?!

Qalib ARİF