Newscenter.az.5.02.2022. Yeni Azərbaycan Partiyası Mərkəzi Aparatının 03 fevral 2022-ci il tarixdə onlayn formatda keçirilən iclasında YAP Yevlax rayon təşkilatının sədr vəzifəsinə təyin olunan Rafiq Əliyev ərazi partiya təşkilatlarının sədrlərinə və yerli təşkilatların partiya aktivinə təqdim olunub.

Newscenter.az-ın xəbərinə görə, qeyd edilib ki, ölkəmizin və regionumuzun ən böyük partiyası olan Yeni Azərbaycan Partiyası avanqard siyasi qüvvə olaraq ölkədə aparılan bütün mütərəqqi və məqsədyönlü işlərin önündə getmiş, Azərbaycan siyasi sisteminə hər zaman yeniliklər gətirmiş və bu sahədə bir çox uğurlara imza atmışdır. Yeni Azərbaycan Partiyasının VII Qurultayında ölkə Prezidenti, Müzəffər Ali Baş Komandan, Yeni Azərbaycan Partiyasının Sədri cənab İlham Əliyevin bilavasitə tapşırıq və tövsiyələri əsasında hazırlanaraq qəbul olunmuş Nizamnamə müasir dövrün reallıqlarına uyğun olan yeni çağırışların, vəzifələrin daha da effektiv şəkildə həyata keçirilməsinə şərait yaradır.

Öz növbəsində yeni sədr vəzifəsinə təyin olunmuş Rafiq Əliyev çıxış edərək fəaliyyətinin bütün mərhələlərində əsası Ulu öndər tərəfindən qoyulan azərbaycançılıq ideologiyasının ətrafında sıx birləşdiyini qürur hissi ilə qeyd edib,bundan sonra da ümummilli maraqların reallaşması yolunda bütün gücünü və bacarığını sərf edəcəyini bildirdi. Rafiq Əliyev göstərilən etimada görə partiya rəhbərliyinə təşəkkürünü bildirib və bu etimadı layiqincə doğruldacağını vurğulayıb.

Təqdimat zamanı bir neçə partiya aktivi ölkəmizin inkişafı, xalqın sosial rifah halının yüksəlməsi və Azərbaycanın beynəlxalq aləmdəki mövqeyinin güclənməsi naminə həyata keçirdiyi uğurlu siyasətə görə Partiyanın Sədri, Ölkə Prezidenti cənab İlham Əliyevə dərin minnətdarlıq hissini ifadə edib, yeni sədr vəzifəsinə təyin edilən Rafiq Əliyevə gələcək fəaliyyətində uğurlar arzulayıb, səmimi təbriklərini çatdırıblar.

Mehman