Newscenter.az.5.02.2022. Fevralın 5-də Azərbaycan Voleybol Federasiyasının Regional İnkişaf Mərkəzi və Təhsil Nazirliyinin birgə təşkilatçılığı ilə 8-10 yaşlı uşaqlar arasında voleybol idman növünün inkişaf etdirilməsi məqsədi ilə məşqçi-müəllimlərinin seminarları keçirilib.

Newscenter.az xəbər verir ki, 18 məşqçi-müəllimin iştirak etdiyi ilk seminar Bakıda “Sərhədçi” İdman Olimpiya Mərkəzində baş tutub.

AVF-nin Regional İnkişaf Mərkəzinin rəhbəri Nərgiz İsmayılova, 4 nömrəli Olimpiya Ehtiyyatları məktəbinin dərs hissə müdiri Çingiz Səmədov, voleybol üzrə beynəlxalq dərəcəli hakim Zaur Hacıyev ilk olaraq iştirakçıları salamlayıb və onlara uğurlar arzu ediblər.

Daha sonra 2021-ci ilin sentyabr ayında Sloveniyada təşkil olunan beynəlxalq məşqçi forumunda iştirak etmiş mütəxəssislərimiz Səbinə Yarməmmədova və Yelena Məmmədova az yaşlı uşaqların voleybol idman növünə cəlb olunması üçün hansı işlərin aparılmasından, məşq prosesinin necə keçirilməsindən danışıblar. Ardınca iştirakçılar yeniyetmə qızlar arasında təşkil olunan yoldaşlıq oyununu izləyiblər.

Seminarın sonunda iştirakçıları maraqlandıran suallara cavab verilib və onlara sertifikat, həmçinin top təqdim olunub.

İdman və ümumtəhsil məktəblərinin məşqçi-müəllimləri üçün fevral və mart aylarında təşkil olunması nəzərdə tutulan seminarlar Bakı şəhəri ilə yanaşı, regionlarda da keçiriləcək.

Mehman