Newscenter.az.20..02.2022 Mehriban xanım Əliyeva. Bu adı çəkərkən gözümüzün önündə Azərbaycan qadının zərafətini, nəcibliyini, daxili dünyasının zənginliyini, mədəniyyətini təcəssüm edən Mehriban xanımın obrazı canlanır. Xeyirxah və nəcib əməlləri ilə milyonların qəlbini fəth edən Mehriban Əliyeva, diqqət və qayğıya ehtiyacı olanların dayağı, ümid yeridir. Xalqın böyük sevgi, hörmət və ehtiram bəslədiyi insandır, Mehriban xanım.
Öz fəaliyyəti ilə insanlara mərhəmət, xeyirxahlıq, yardım etmək kimi hiss və bacarıqları aşılayan Mehriban xanım Əliyeva, gələcək nəslin nümayəndələrinə xüsusi həssaslıq nümayiş etdirir. Uşaq evlərini, internat məktəblərini ziyarət edir, oranın sakinlərinə tək olmadıqlarını öz əməlləri ilə sübut edir.
Mehriban Əliyevanın gördüyü bütün işlər, onun Vətəninə, xalqına və torpağına nə qədər bağlı olduğunu tam şəkildə əks etdirir. Ölkəmizdə elə bir sahə yoxdur ki, Mehriban xanımın diqqətindən kənarda qalsın. Onun təhsil, mədəniyyət, incəsənət, idman, səhiyyə və s. digər sahələrə verdiyi mühüm töhfələri, ölkəmizin ictimai-siyasi, mədəni həyatındakı misilsiz xidmətlərini saymaqla bitməz. Rəhbərlik etdiyi Heydər Əliyev Fondunun dəstəyi ilə Vətən müharibəsi iştirakçılarının, şəhid ailələrinin, qazilərin və ehtiyacı olan minlərlə insanın tibbi müalicəsi Mehriban xanımın görmüş olduğu işlərin çox cüzi bir hissəsini təşkil edir. Birinci xanımın reallaşdırdığı layihələrin hər birinin mühüm əhəmiyyətə malik olması Azərbaycan xalqına çox yaxşı məlumdur. Bunu vətəndaş olaraq hər birimiz yüksək dəyərləndirir, xeyirxah və nəcib əməllərin sahibi olan Mehriban xanıma sonsuz hörmət və ehtiramımızı çatdırırıq.
Bu gün Mehriban xanım Əliyevanın Azərbaycan Respublikasının Birinci vitse-prezidenti vəzifəsinə təyin edilməsindən 5 il ötür. Ona həvalə edilən bütün vəzifələri ən yüksək səviyyədə və ləyaqətlə yerinə yetirən Mehriban xanıma sağlam və uzun ömür, ailə səadəti, ictimai-siyasi fəaliyyətində, ölkəmizin tərəqqisi və xalqın rifahı naminə gördüyü işlərdə yeni-yeni uğurlar arzulayıram.
Azərbaycan xalqının böyük sevgisini, inam və etimadını qazanmış Birinci vitse-prezidentimizə nurlu sabahlar diləyi ilə...
Jalə Əhmədova
Milli Məclisin deputatı
