Newscenter.az.16.03.2022. Avropa İttifaqı tərəfindən maliyyələşdirilən və Qax, Zaqatala və Balakən rayonlarını əhatə edən “Azərbaycanın şimal-qərb bölgəsində dayanıqlı və inklüziv aqro-ərzaq sistemlərinin inkişaf etdirilməsi” layihəsi çərçivəsində bal və digər arıçılıq məhsullarının hazırlanması, düzgün qablaşdırılması və ekoloji təmiz qoz mürəbbəsinin hazırlanmasına dair təlimlər baş tutub.
Newscenter.az xəbər verir ki, təlimlərin əsas məqsədi istehsalçıların bazara çıxışına dəstək olmaq və qeyd olunan məhsulların brendləşdirilməsidir. Eyni zamanda ekoloji təmiz qoz mürəbbəsinin və arıçılıq məhsullarının hazırlanma qaydalarını fermerlərə praktiki şəkildə göstərmək, onları istehsala cəlb etməkdir.
Qax rayonunda həyata keçirilən təlimlərdə arıçılığın təşkili, bal, polen, arı südü, mum, propolis, çiçək tozu, güləm və arı zəhərinin insan sağlamlığında əhəmiyyəti və bu kimi mövzular müzakirə olunub. Təlimlərdə arı yeşiklərinin daşınması və yeşik istehsalı zamanı materialın seçilməsi zamanı polirutan materialın istifadəsi mütəxəssislər tərəfindən məsləhət görülüb. Daha sonra təlim praktik məşqlər Qax rayounun Ləkit kəndində yerləşən Bal Evində davam edib. Təsərrüfatda yerləşən arıçılıqda istifadə olunan müxtəlif qurğular, texnikalar və istifadə qaydaları iştirakçılara təqdim olunub.
Ekoloji təmiz qoz mürəbbəsinin hazırlanaraq brendləşdirilməsi dair təlimlər Zaqatala rayonunun Kebeloba kəndində bu məhsulun istehsalı və inkişaf etdirilməsi istiqamətində müraciət etmiş qrupla birgə təşkil olunub. Təlimlərdə mütəxəssislərlə birgə istehsal qrupları iştirak edib və praktik şəkildə qoz mürəbbəsi hazırlanması prosesi baş tutub.
Təlim zamanı məhsulun hazırlanması, yığımdan əvvəl qoz ağaclarına aqrotexniki qulluğun edilməsi, yaşıl qozun yığılma qaydaları, əl ilə soyulması, soyulmuş qozun yodunun su ilə yuyulması, əhəngdən sonra deşilməsi, şərbətin hazırlanması və qoz mürəbbəsinin qablaşdırılması mərhələli şəkildə istehsalçı qrup üzvlərinə təqdim olunub.
Layihə Avropa İttifaqının maliyyə dəstəyi və BMT-nin Ərzaq və Kənd Təsərrüfatı Təşkilatının təşkilatçılığı ilə həyata keçirlir.
Sevinc
