Yeni Azərbaycan Partiyası Nizami rayon təşkilatı müzəffər Ali Baş Komandan İlham Əliyevin 2018-ci ilin aprel ayının 11-də növbəti dəfə Prezident seçilməsinin dördüncü ildönümü münasibətilə “Azərbaycan xalqının seçimi davamlı inkişaf və siyasi sabitlikdir” mövzusunda konfrans keçirib.
Newscenter.az xəbər verir ki, konfransda Azərbaycan Respublikasının Dövlət Himni səsləndirildikdən sonra ölkəmizin ərazi bütövlüyü və suverenliyi naminə canını qurban vermiş şəhidlərimizin əziz xatirəsi bir dəqiqəlik sükutla yad edilib.
Sonra müzəffər Ali Baş Komandan İlham Əliyevin prezidentliyi dövründə ölkəmizin keçdiyi böyük inkişaf yoluna, ümumilikdə xalqımızın seçimini Prezident İlham Əliyevin xeyrinə müəyyən edən amilləri özündə əks etdirən video-çarx nümayiş etdirilib.
Konfransda çıxış edən Yeni Azərbaycan Partiyasının Veteranlar Şurasının üzvü, Azərbaycan Respublikası Auditorlar Palatasının sədri, professor Vahid Novruzov, YAP İdarə Heyətinin üzvü, Milli Məclisin deputatı Cavid Osmanov, YAP Gənclər Birliyinin sədri Bəxtiyar İslamov, Vətən Müharibəsi Qəhrəmanı, şəhid Azad Hümbətovun atası Arif Hümbətov, Vətən müharibəsinin qazisi, Prezident İlham Əliyevin 2022-ci ildə gənclər ilə keçirdiyi görüşün iştirakçısı Quzlayev Denis Sergeyeviç, YAP Nizami rayon təşkilatının sədri Ramil Vəlibəyov və başqaları bildiriblər ki, dörd il öncə keçirilmiş növbədənkənar prezident seçkilərində Yeni Azərbaycan Partiyasının namizədi, partiyanın Sədri cənab İlham Əliyev şəffaf, azad, demokratik şəraitdə keçirilən seçkilərdə Azərbaycan seçicilərinin mütləq əksəriyyətinin səsini qazanaraq Azərbaycan Respublikasının Prezidenti seçilib.
Vurğulanıb ki, Azərbaycan xalqının iradəsini əks etdirən Prezident seçkilərinin nəticələrinə əsasən Azərbaycan xalqı görülən işlərə yüksək qiymət, inkişafa, tərəqqiyə, təhlükəsizliyə, gələcəyə səs verib. Seçkilərdən əvvəl yerli və beynəlxalq təşkilatlar tərəfindən keçirilmiş rəy sorğuları, seçkilər günü baş tutan “exit-poll”lar seçkilərin rəsmi nəticələri ilə üst-üstə düşüb ki, bu da bir daha seçkilərin xalqın iradəsini əks etdirdiyini göstərib.
Diqqətə çatdırılıb ki, cənab İlham Əliyevin prezidentliyi dövründə ölkəmiz böyük inkişaf yolu keçib, dövlətçiliyimizin əsasları ciddi şəkildə möhkəmlənib, dövlətimiz güclənib, onun qüdrəti və iqtisadiyyatı daha da artıb, Azərbaycanın beynəlxalq müstəvidə mövqeyi xeyli dərəcədə güclənib, insan amili, xalqın rifahı və milli maraqlar dövlət siyasətinin strateji prioritetləri olublar. Bu mənada seçicilərin mütləq əksəriyyətinin Prezident İlham Əliyevə səs verməsi, əslində ölkədə aparılan demokratik islahatlara davam, bütün destruktiv və xain qüvvələrə isə yox deyib, xarici qrant, ianə hesabına fəaliyyət göstərən, öz dövlətinə qarşı çıxış edən, bir çox hallarda milli satqınlıq nümayiş etdirən ünsürlərə bir daha öz yerini göstərib.
Çıxışlardan sonra mükafatlandırma mərasimi olub. YAP-a yeni üzv qəbul edilmiş bir qrup şəxsə partiya vəsiqələri, ictimai aktivliyinə görə fəallara təşəkkürnamələr, rayon təşkilatının könüllülük fəaliyyəti layihəsinin məzunlarına isə sertifikatlar təqdim edilib.
Sonda "Gənc aktyorlar" dərnəyinin üzvü Nəcəfova Türkan Ramiz qızının ifasında “İlhamla irəli” şeiri səsləndirilib.
Ruhiyyə
