BMqT-nin Azərbaycan nümayəndəliyi və Dövlət Miqrasiya Xidməti (DMX) Beynəlxalq Miqrasiya İcmalı Forumuna (BMİF) həsr olunmuş “Təhlükəsiz, nizamlı və qanuni miqrasiya üzrə Qlobal Paktın Azərbaycanda icrasında bütün cəmiyyətin iştirakının vacibliyi” mövzusunda sayca 2-ci məsləhətləşmələr təşkil etdi.
Newscenter.az xəbər verir ki, tədbirin məqsədi “Təhlükəsiz, nizamlı və qanuni miqrasiya üzrə Qlobal Pakt”ın icrasında və Azərbaycanda miqrasiya siyasətinin formalaşmasında bütün cəmiyyətin iştirakının vacibliyi barədə fikir mübadiləsinin aparılması idi.
Müzakirələr BMqT-nin Azərbaycan nümayəndəliyinin rəhbəri Vladimir Qyorqiyev və DMX-nin rəisi Vüsal Hüseynovun rəsmi açılış nitqləri başladı.
Açılış nitqində Qyorqiyev yerli vətəndaş cəmiyyəti təşkilatlarına miqrasiyanın idarə edilməsi yollarını müzakirə etmək və Qlobal Paktın həyata keçirilməsində onların rolunu tapmaq imkanı verilməsinin vacibliyini vurğuladı. “Miqrasiya heç vaxt bitməyən bir mövzudur. Məhz buna görə də insan mobilliyi və onun tənzimlənməsi həmişə maraqlı tərəflərin və tərəfdaşların diqqət mərkəzində olmalıdır”, deyə Qyorqiyev bildirdi.
Miqrasiya xidmətinin rəisi Vüsal Hüseynov öz çıxışında qeyd etdi ki, miqrasiyanın müxtəlif aspektləri üzrə təşəbbüslərin real uğura çevrilməsi üçün Miqrasiya üzrə Qlobal Paktın həyata keçirilməsində vətəndaş cəmiyyət təşkilatlarının iştirakı vacibdir. Onun sözlərinə görə hazırda yerli QHT-lərin, xarici miqrantların və özəl sektorun nümayəndələrini bir araya toplayan və Xidmətin nəzndində yaradılan Miqrant Şurası, İctimai Şura və Məsləhət Şurası miqrasiya sahəsində problemlərin həllində dövlət qurumları və cəmiyyət arasında əməkdaşlığın yaxşı nümunəsidir.
Məsləhətləşmələr BMqT-nin Azərbaycandakı nümayəndəliyinin təmsilçisi Nərgiz Kərimova və Dövlət Miqrasiya Xidməti yanında İctimai Şuranın sədri Azər Allahverənovun Qlobal Pakt və miqrasiya sahəsində cəmiyyət nümayəndələrinin rolu haqda çıxışları ilə davam etdi.
Dövlət Miqrasiya Xidməti yanında fəaliyyət göstərən Miqrant Şurasının, İctimai Şuranın, Məşvərət Şurasının və Bakı Dövlət Universitetinin nümayəndələri də Azərbaycanda Qlobal Paktın tətbiqinə vətəndaş cəmiyyəti təşkilatlarının necə töhfə verə biləcəyi ilə bağlı fikirlərini bölüşdülər.
Sonda iştirakçılar miqrasiya ilə bağlı aktual məsələləri müzakirə edib, fikir mübadiləsi aparıblar.
Sevinc
