Bu gün Beynəlxalq Türk Akademiyasının prezidenti Darhan Kıdırəli Qazaxıstan Respublikasının rəqəmsal inkişaf, innovasiya və aerokosmik sənaye naziri Bagdat Mussin ilə görüşüb.

Newscenter.az Akademiyaya istinadən xəbər verir ki, görüşdə Türk Akademiyasının vitse-prezidenti Füzuli Məcidli də iştirak edib.

Görüş zamanı tərəflər Türk dünyasının rəqəmsal identifikasiyası ilə bağlı fikir mübadiləsi aparıb, bir sıra layihələrdən danışıblar.
Beynəlxalq Türk Akademiyası (International Turkic Academy) tərəfindən hazırlanmış “Atalar mirası” layihəsinin genişləndirilməsi və təkmilləşdirilməsi müzakirə olunub.

Türk Akademiyasının hazırladığı iki cildlik “Türküstan Ensiklopediyası”nın təməlində Türk dünyasının elektron ensiklopediyasının yaradılması, müvafiq dövlət qurumlarının bu prosesə dəstəyi barədə danışılıb.

Eyni zamanda, Təhsil Nazirləri Şurasında Türk Akademiyası tərəfindən irəli sürülən - Türk dünyasında elmi əsərlərin, dissertasiyaların, arxivlərin və elmi kitabxanaların rəqəmsallaşdırılması, vahid rəqəmsal bazasının formalaşdırılması təşəbbüsü ətrafında fikir mübadiləsi aparılıb.

Nazir B.Musin Rəqəmsal İnkişaf, İnnovasiya və Aerokosmik Sənaye Nazirliyinin türk xalqlarının daha sıx şəkildə inteqrasiyasına xidmət göstərən təşəbbüsləri dəstəklədiyini, bu istiqamətdə Türk Akademiyası ilə əməkdaşlığı gücləndirmək niyyətində olduğunu qeyd edib.

Görüşün sonunda D.Kıdırəli Türk Akademiyasının təşəbbüslərini dəstəklədiyinə görə nazirə təşəkkürünü bildirib və qurumun nəşr etdiyi dəyərli nəşrləri təqdim edib.

Mehman