“Ümumiyyətlə, Avropa Şurasının Rusiyanın Ukraynaya təcavüzü ilə bağlı qətnamə qəbul etməsi mənim üçün təəccüblü oldu, çünki Rusiya Avropa Şurasından çıxarılıb. Belə olan halda, qətnamənin mahiyyəti anlaşılan deyil. Milli Məclisin deputatlarından yalnız Erkin Qədirlinin həmin qətnamənin lehinə səs verməsi təbiidir. Parlamentdə müxtəlif siyasi partiyalar təmsil olunur və hər birinin özünəməxsus mövqeyi var”.
Bunu Pravda.az-a açıqlamasında Milli Məclisin deputatı Nəsib Məhəməliyev “Avropa Şurası Parlament Assambleyası (AŞPA) Rusiya Federasiyasının Ukraynaya qarşı davam edən təcavüzü: Avropa Şurasının rolu və cavabı” adlı qətnamə barədə danışarkən deyib.
Deputat qeyd edib ki, deputatların siyasi baxışları bir-birindən fərqli olduğu üçün Erkin Qədirlinin qətnaməni dəstəkləməsi təbiidir: "Ümumiyyətlə isə, Azərbaycan dövləti xarici siyasətini milli və dövlət maraqlarına uyğun şəkildə həyata keçirir. Ukraynanı hərtərəfli - mənəvi, maddi, siyasi cəhətdən dəstəkləməyimizə baxmayaraq, Rusiya ilə də ortaq tarixi bölüşürük. Nəzərə almaq lazımdır ki, Rusiyanın Cənubi Qafqaz regionuna təsir imkanları kifayət qədər çoxdur. Xüsusilə də, keçmiş Qarabağ münaqişəsi, Azərbaycan-Ermənistan münasibətləri istiqamətində Rusiyanin rolu böyükdür. Belə olan halda, Rusiya kimi böyük dövləti öz əleyhimizə yönəltməyə imkan vermək olmaz. Elə siyasət aparmaq lazımdır ki, Azərbaycanın milli maraqları və təhlükəsizliyi ziyan görməsin. Prezident İlham Əliyevin bu istiqamətdə apardığı balanslı siyasət tam şəkildə özünü doğruldur. İndiki vəziyyətdə Azərbaycanın istənilən tərəfi birbaşa dəstəkləməsi bizim xeyrimizə deyil. Əksinə, bu, Azərbaycana ziyan vura bilər. Ona görə də qətnamənin səsverməsində parlamentin deputatlarının bitərəf qalması anlaşılandır. Əsas odur ki, həm Ukrayna, həm də Rusiya Azərbaycanın mövqeyindən narazı deyil”.
Qeyd: “Avropa Şurası Parlament Assambleyası (AŞPA) Rusiya Federasiyasının Ukraynaya qarşı davam edən təcavüzü: Avropa Şurasının rolu və cavabı” adlı qətnamə layihəsinin lehinə azərbaycanlı deputatlardan yalnız deputat Erkin Qədirli səs verib.
