"Mətbuata verdiyim son müsahibəmdə Azərbaycan Milli Azadlıq Hərəkatının Lideri, Azərbaycan Respublikasının ikinci prezidenti Əbülfəz Elçibəy barədə fikirlərimin yanlış anlaşıldığını təəssüf hissi ilə qarşıladım. Dil sürüşməsindən qaynaqlandığını hesab etdiyim yanlış anlaşılmanı aradan qaldırmaq məqsədilə bu mövzuda fikirlərimi bir daha ictimaiyyətlə bölüşməyi uyğun görürəm".

Newscenter.az xəbər verir ki, bu fikirləri "Palmali" Şirkətlər Qrupunun prezidenti Mübariz Mənsimov səsləndirib. O qeyd edib ki, Əbülfəz Elçibəyin şəxsiyyətinə və əziz xatirəsinə hər zaman böyük hörmət hissi duyub:

"Elçibəyin təvazökarlığı, səmimiliyi, vətənsəvərliyi, humanistliyi bütün Türk dünyasına yaxşı məlumdur. Elçibəy, dövlətinin və xalqının maraqları naminə tutduğu ali vəzifədən fədakarlıq etməyi bacaran Vətən sevdalısıydı. Şəxsiyyətinə böyük rəğbət bəslədiyim mərhum Azərbaycan Prezidenti Heydər Əliyevlə Elçibəyin siyasi təcrübəsini müqayisə edərkən nitqimdə yaranan dil sürüşməsi Elçibəyi sevənlərdə üzüntü yaratmış, bəd niyyətli insanlar isə bunu öz çirkin məqsədləri üçün istifadə etmişdir. Mən Elçibəyə hörmət və ehtiramımı əvvəllər də dönə-dönə ifadə etmişəm. Elçibəyin Azərbaycan tarixində rolu və xidmətləri danılmazdır. Dil sürüşməsindən qaynaqlanan ifadəyə görə üzrxahlıq etməklə birlikdə, bunu bəd niyyətlə istifadə edənlərə "yazıqlar olsun" deyirəm".

Mübariz Mənsimov bildirib ki, Azərbaycan dövlətinə və onun qanunlarına daim sadiq olub, son nəfəsimə qədər də sadiq qalacaq:

"Mən dövlətçiliyə qarşı deyiləm, haqsızlığa qarşıyam. Azərbaycanın inkişafı naminə həmrəy olmağımızın və bir-birimizə qarşı ədalətli olmağımızın önəmli olduğuna inanıram. Xoş niyyət və səmimiyyətlə verdiyim açıqlamalarda ayrı məna axtarmağın əbəs olduğunu düşünür, bu məkrli çabaların Azərbaycan dövlətinə və xalqına olan sevgimdə, sədaqətimdə zərrə qədər dəyişiklik yaratmayacağını bildirirəm".

Mehman