"Müəyyən sahələr üzrə aylıq əmək haqları artırılsa da büdcə təşkilatlarından kənar insanlara bu şamil edilmədi. O cümlədən aylıq maaş almayan aztəminatlı və ya günəmuzd çalışan insanlar bu əmək haqqı artımlarından bəhrələnə bilmədilər. Belə qəbildən olan insanların həyat şəraitinə infilyasiya ciddi təsir etməkdədir".

Newscenter.az xəbər verir ki, bu fikirləri iqtisadçı Eldəniz Əmirov səsləndirib. Onun sözlərinə görə, buna görə də həmin insanların maddi təminat məsələsinə yenidən baxılmasına böyük ehtiyac var:

"Hazırda mövcud neft qiymətləri də büdcəyə yenidən baxmaq üçün geniş imkanlar yaradır ki, bu yolla əmək haqqı artımlarından yararlana bilməyən, amma həyat səviyyələrinə infilyasiyanın ciddi problem yaratdığı insanlara dəstək göstərilsin. Aydın məsələdir ki, ölkə müharibədən çıxıb, quruculuq işləri, şəhid və qazi ailələrinə dəstək, dövlət investisiya layihələri, ərzaq təhlükəsizliyinim təminatı və s. məsələlərlə əlaqədar xeyli maliyyə vəsaiti xərcləyirik. Bütün bunlar həm işlərin sürətinə, həm də çox şaxəliliyinə görə həqiqətən alqışa layiqdir. Amma bunlar aztəminatlı insanların infilyasiya tərəfindən əzilməsinə sakit dayanıb baxmağa əsas ola bilməz".

Eldəniz Əmirov qeyd edib ki, ölkənin 53 milyard dollara yaxın ehtiyat valyutası var:

"Yəni təhlükəsizlik yastığı güvəniləcək dərəcədədir. Neft büdcədə 50 dollar götürülsə də ən azı 2 dəfədən artıq baha satılır. Odur ki, heç olmasa infilyasiyanın daha çox təsirləndirdiyi aztəminatlı insanları dəstəkləmək məqsədilə büdcəyə yenidən baxmaq üçün heç bir maneə yoxdur. Dəstəyin formasına gəldikdə isə bunu ən müxtəlif forma və üsullarla reallaşdırmaq olar. Ümid edirəm ki, aidiyyatı subyektlər bu məsələni ən qısa zamanda gündəmə gətirəcəklər".

Mehman