Nizami rayonunda Bakı Şəhər Mədəniyyət Baş İdarəsi və Missiya Media Qrupunun birgə təşkilatçılığı ilə “Şuşa İli”nə həsr olunmuş konsert təşkil olunub.
Newscenter.az xəbər verir ki, Bakı Neft Emalı Zavodunun Akt Zalında keçirilən konsertdə şəhid anaları, qazilər, millət vəkili Sədaqət Vəliyeva, Bakı Şəhər Mədəniyyət Baş İdarəsinin, Nizami rayonu Mədəniyyət Mərkəzi, Gənclər və İdman idarəsinin nümayəndələri, Azərbaycan Ağsaqqallar Şurasının və Türk Ağsaqqalları Birliyinin təmsilçiləri, Nizami rayon İcra Hakimiyyətinin, eləcə də Nizami Bələdiyyəsinin məsul şəxsləri, rayon iştimaiyyətinin nümayəndələri, həmçinin təhsil müəssilərinin kollektivləri iştirak edib.
Tədbirdə əvvəlcə Dövlət Himni səsləndirilib, Azərbaycanın şəhid övladlarının ruhu bir dəqiqəlik sükutla yad edilib. Çıxış edən millət vəkili Sədaqət Vəliyeva Şuşa şəhərinin Azərbaycan tarixindəki rolundan, Prezident İlham Əliyevin Azərbaycanın mədəniyyət paytaxtına verdiyi önəmdən və qəhrəman əsgərlərimizin şəhəri böyük fədakarlıqla azad etməsindən danışıb.
Millət vəkili bildirib ki, prezident İlham Əliyev ata vəsiyyətini yerinə yetirib, tarixi Azərbaycan şəhəri Şuşanı azad edib. Daha sonra çıxış edən Azərbaycan Ağsaqqallar Şurasının Nizami rayon Təşkilatının sədri Mail Əliyev isə Ulu Öndər Heydər Əliyevin Şuşa şəhərinə verdiyi önəmdən danışıb. Bildirib ki, Ulu Öndər Şuşa şəhərinin inkişafını daim diqqətdə saxlayıb, tarixi şəhərin erməniləşdirilməsinə heç vaxt imkan verməyib.
Dövlətimizin şəhid ailələrinə və qazilərə göstərdiyi diqqət və qayğıdan danışan Nizami rayon İcra Hakimiyyətinin məsul işçisi Bəhmən Hüseynov bildirib ki, ölkəmizdə müvafiq kateqoriyadan olan şəxslərə prezident İlham Əliyevin tapşırığı ilə xüsusi qayğı göstərilir, onları sosial problemlərinin həlli ilə bağlı uğurlu proqramlar həyata keçirilir.
Missiya Media Qrupunun baş redaktoru Nicat Dağlar isə çıxışı zamanı Şuşa şəhərində prezident İlham Əliyevin rəhbərliyi ilə həyata keçirilən quruculuq işlərinə toxunub. Missiya Media Qrupunun sosial layihələrindən danışan Nicat Dağlar təmsil etdiyi qurumun bundan sonra da Nizami rayonun ictimai-siyasi, həyatında, eləcə də sosial-humanitar layihələrindən yaxından iştirak edəcəyini bildirib.
Nizami rayonu Mədəniyyət Mərkəzi, Gənclər və İdman İdarəsinin nümayəndələri də çıxışlarında tədbirin mahiyyəti barədə söz açaraq bu kimi layihələrin davamlı şəkildə həyata keçiriləcəyini bildiriblər. Daha sonra tədbirin bədii hissəsi başlayıb. Əvvəlcə Nizami rayonunun musiqi kollektivləri çıxış edib, ardınca Şuşa ilə bağlı təsirli şeirlər təqdim olunub. Bunu ardınca Şuşa ili ilə bağlı Missiya TV tərəfindən hazırlanmış videoçarx nümayiş etdirilib.
Ruhiyyə
