Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə böyük Zəfərə aparan yolun 27 sentyabr Vətən Müharibəsinin başladığı ilk günün qeyd edildiyi Anım Günü haqqında “Xotira kuni (Ozarbayjon)” adlı bölmə istifadəyə verilib.
Newscenter.az xəbər verir ki, Azərbaycan Mədəniyyət Mərkəzinin "Wikipedia" heyəti tərəfindən yaradılmış bölmədə Azərbaycanda hər ilin 27 sentyabr tarixində ildönümü dövlət səviyyəsində qeyd edilən Anım Günü haqqında məlumat verilərək bu günün Azərbaycan Respublikasında 2020-ci il sentyabrın 27-dən noyabrın 10-a qədər davam edən İkinci Qarabağ müharibəsində həyatını itirən şəhidlərin xatirəsinin anılması məqsədilə keçirildiyi və bununla bağlı ölkə başçısı Prezident İlham Əliyevin 2020-ci il dekabrın 2-də imzaladığı "Azərbaycan Respublikasında Anım Gününün təsis edilməsi haqqında" sərəncama əsasən qeyd edildiyi vurğulanıb.
Ümumilikdə 6 bölmədən və zəngin istinad siyahısından, keçidlərdən ibarət vikiməqalədə Anım Gününün mahiyyəti, Azərbaycan dövlətinin tarixindəki əhəmiyyətindən söz açılaraq, bu günün Azərbaycan xalqının taleyində böyük taleyüklü bir hadisə olması qeyd olunur.
Vikibölmədə eyni zamanda İkinci Qarabağ müharibəsinin başlanması haqqında məlumat verilərək 27 sentyabr 2020-ci il səhər saatlarında Ermənistan Silahlı Qüvvələrinin genişmiqyaslı təxribat törədərək cəbhəboyu zonada yerləşən Azərbaycan ordusunun mövqelərini və yaşayış məntəqələrini iriçaplı silahlar, minaatanlar və müxtəlif çaplı artilleriya qurğularından intensiv atəşə tutması nəticəsində, Ermənistan ordusunun döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə Azərbaycan ordusunun komandanlığı tərəfindən qoşunların bütün cəbhə boyu sürətli əks-hücum əməliyyatı başlaması barədə qərar haqqında da məlumat verilmişdir.
Vikiməqalədə Prezident İlham Əliyevin İkinci Qarabağ müharibəsi bitdikdən sonra Vətən müharibəsinin başladığı günü "Anım Günü" kimi qeyd etmək barədə sərəncamı haqqında da məlumat verilmiş və Sərəncamın mətni də məqalədə yer almışdır.
Wikipedia" Elektron Ensiklopediyasında Anım Günü haqqında özbək dilində bölmə ilə https://uz.wikipedia.org/wiki/Xotira_kuni_(Ozarbayjon) adlı linkdə tanış olmaq mümkündür.
R.Mehdiyeva
