Amerika İslam Əlaqələri Şurası (CAIR) Qəzza zolağının ən böyük xəstəxanası olan Əl-Şifaya hücumun İsrail tərəfindən ABŞ prezidenti Co Baydenin icazəsi ilə həyata keçirildiyini bildirib.

Newscenter.az xəbər verir ki, CAIR-in müvafiq bəyanatı təşkilatın saytında dərc olunub.

"Hökumətimiz İsrailə bəşəriyyətə qarşı bu son cinayətə yaşıl işıq yandırdı", - CAIR Milli Kommunikasiyalar Direktoru İbrahim Xuper deyib.

O, xəstəxana ərazisində gedən döyüşləri insan haqlarının pozulması kimi pisləyib və ABŞ-ı İsrailə dəstəyini dayandırmağa və Fələstində davamlı və ədalətli sülhün bərqərar olmasının tərəfdarı olmağa çağırıb.

Noyabrın 16-da səhər saatlarında “Əl-Cəzirə” xəbər verib ki, İsrail ordusu Qəzzada Əl-Şifa xəstəxanasının bütün şöbələrinə basqın edir və insanların binadan çıxarılmasına mane olur. Ordu xəstəxanada silah və HƏMAS komandanlığının aşkarlandığını bildirib.

Anar TAGİYEV