Bu gün Ana Vətən Partiyası VIII qurultayını keçirdi. Qurultayda 07 fevral 2023-cü il növbədənkənar Prezident seçkiləri və partiyanın nizamnaməsində dəyişikliklər haqqında məsələlər müzakirə olundu.

Newscenter-az xəbər verir ki, birinci məsələ haqqında partiyanın sədri, millət vəkili Fəzail Ağamalı çıxış edərək, növbədənkənar Prezident seçkilərini zəruri edən amillər üzərində dayanaraq, seçkilərdə İlham Əliyevin namizədliyini irəli sürən Yeni Azərbaycan Partiyasının qərarını dəstəkləməyi ən doğru addım kimi qiymətləndirdi. Fəzail Ağamalının təklifi ətrafında Rəşadət Yaqublu, Günay Ağamalı, Nazim Muradəlizadə, Xaliq Şükürov, İradə Məlikzadə, Xalid Əliyev çıxışlarında İlham Əliyevin namizədliyini dəstəklədilər. Partiyanın sədri Fəzail Ağamalı və çıxış edənlər ölkədə gedən siyasi prosesləri, xüsusilə siyasi partiyaların mütləq əksəriyyətinin milli dövlətçiliyimiz üçün mühüm əhəmiyyət kəsb edən Prezident seçkilərində fəal iştirak etmək niyyətlərini müsbət qiymətləndirməklə bərabər, AXCP-nin seçkiləri “boykot” etmək kimi absurd və qeyri-real qərarını anti-milli və anarxist mövqe kimi qiymətləndirdilər və Əli Kərimovun ölkəmizə düşmən kəsilən antiazərbaycan qüvvələrinin içərisində yer alaraq, dövlətçiliyimizə qarşı düşmənçilik xəttini davam etdirməsini qətiyyətlə pislədilər.

Çıxış edənlər əminliklə bildirdilər ki, sosial bazası olmayan “sədrlik” etdiyi Partiyanın adından qanuna zidd istifadə edən Ə.Kərimovun məkrli niyyəti heç bir nəticə verməyəcək və Azərbaycan xalqı böyük siyasi fəallıqla 07 fevral 2024-cü il növbədənkənar Prezident seçkilərində iştirak edəcək, yüksək vətəndaşlıq mövqeyini ortaya qoyacaqdır.

Daha sonra qurultay partiyanın nizamnaməsinin yeni redaksiyasını qəbul etdi.

Qurultay Prezident seçkilərilə bağlı müzakirəyə yekun vuraraq, 07 fevral 2024-cü ildə keçiriləcək növbədənkənar Prezident seçkilərində İlham Əliyevin namizədliyinin dəstəklənməsi yekdilliklə qəbul etdi.



Süleyman