Ermənistanın baş naziri müntəzəm olaraq bir-birini təkzib edən açıqlamaları ilə gündəmə gəlir. Bir müddət əvvəl sülh müqaviləsinin imzalanmasını zəruri hesab edən Paşinyan, indi də müqavilədən əvvəl kommunikasiyaların açılmasının zəruriliyini qeyd edir.

Newscenter.az-ın xəbərinə görə, politoloq Elxan Şahinoğlu da bu qənaətdədir. Onun sözlərinə görə, Ermənistanın baş naziri Nikol Paşinyan sülh müqaviləsi imzalanmazdan əvvəl Azərbaycanla kommunikasiyaların açılmasını tamamilə mümkün hesab etdiyini bildirib:

"Paşinyan bu cür kombinasiya haqqında ilk dəfədir açıqlama verir. “Praktiki addımlarla real dünyanı formalaşdırmaq, ondan sonra müqavilə imzalamaq mümkündür” – deyən Nikol Paşinyan rəsmi Bakının maneəsiz keçid şərtini qəbul etməyə hazırdırmı? Paşinyanın “praktiki addımlarla real dünya” haqqında fikrini belə oxumaq mümkündür ki, baş nazir dəhlizlə bağlı əvvəlki fikirlərini korrektə etməyə hazırdır. Amerikalı diplomatlar Paşinyana məsləhət görüblər ki, Zəngəzur dəhlizinin açılmasını ləngitməkdə davam etsə, Azərbaycan İran ərazisindən keçən Araz dəhlizinə üstünlük verəcək".

Politoloq hesab edir ki, bu həm ABŞ-ın maraqlarına ziddir, həm də Ermənistanı Orta dəhliz layihəsindən kənarda qoyacaq:

"Paşinyanın məlum açıqlamasından bir gün əvvəl Ermənistan parlamentinin sədri Alen Simonyan da dəhlizin açılması üçün neytral ölkələrin və beynəlxalq təşkilatlardan birinin bu prosesə cəlb edilə biləcəyini söyləmişdi".

Anar Əliyev