![Dövlət Komitəsində italiyalı memarla görüş olub](/uploads/posts/2024-07/img_20240725_111227.jpg)
Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsində İtaliyanın “Delogu Architecture” memarlıq şirkətinin rəhbəri Françesko Deloqu ilə görüş olub.
Newscenter.az xəbər verir ki, Prezident İlham Əliyevin rəhbərliyi ilə Qarabağ və Şərqi Zəngəzurda aparılan bərpa-quruculuq işləri, işğaldan azad edilmiş ərazilərə Böyük Qayıdışa dair I Dövlət Proqramında nəzərədə tutulan tədbirlərin icrası haqqında italiyalı qonağa məlumat verən komitə sədri Rövşən Rzayev Ermənistanın işğalı nəticəsində otuz ilə yaxın müddətdə məcburi köçkün vəziyyətində yaşayan həmvətənlərimizin mütləq əksəriyyətinin öz dogma yurduna geri dönmək arzusunda olduğunu bildirib. Hazırda işğaldan azad edilmiş ərazilərdə onlar üçün yeni yaşayış məntəqələrinin tikildiyi, Şuşada və Laçında bərpa işlərinin aparıldığı, bu zaman müasir memarlıq üsullarında istifadə edildiyi vurğulanıb.
İtaliyalı memar Azərbaycanın işğaldan azad edilmiş ərazilərində sürətlə və geniş miqyasda aparılan bərpa-quruculuq işləri ilə tanış olduğunu vurğulayaraq, bütün bunların köçkün əhalinin tezliklə geri qayıdışına şərait yaradacağını qeyd edib. Bildirib ki, ölkəmizə səfərinin məqsədi Azərbaycan hökumətinin işğaldan azad olunmuş ərazilərin dirçəldilməsi və inkişaf etdirilməsi istiqamətindəki səylərinə dəstək verməkdir.
Dövlət Komitəsinin sədri qonağın ölkəmiz üçün prioritet sayılan məsələyə marağını və Böyük Qayıdışa dəstək vermək niyyətini yüksək qiymətləndirib, onun suallarını cavablandırıb, ona yaradıcılıq işlərində uğurlar arzulayıb.
Xatırladaq ki, “Delogu Architecture” memarlıq şirkəti şəhər-bölgə planlaması, yaşayış binalarının və mehmanxaların layihələndirilməsi sahəsində geniş təcrübəyə sahibdir.
Süleyman