"ABŞ-da son prezident seçkiləri yalnız bir siyasətçinin qələbəsi deyil, həm də yeni bir iqtisadi və siyasi güc mərkəzinin yüksəlişi kimi dəyərləndirilə bilər".

Newscenter.az xəbər verir ki, bunu siyasi ekspert Rəfail Eminov deyib. O bildirib ki, Trampın təmsil etdiyi qüvvələr, ənənəvi "dərin dövlət" və ya güclü ailələr tərəfindən dəstəklənən siyasi və iqtisadi nizamdan fərqlidir:

"Bu yeni qüvvələr, özlərinə məxsus fərqli strategiyalarla ABŞ və dünya iqtisadiyyatında öz mövqelərini gücləndirmək istəyirlər.

Yeni Güc Elitası Tramp vasitəsilə öz iqtisadi təsirini genişləndirməyə çalışır. Bu yeni elit qruplar, əsrlər boyu dünya iqtisadiyyatını və siyasətini formalaşdırmış ənənəvi Rokfeller və Rotşild ailələri ilə rəqabətdədir. Tramp isə bu elitaların sərvətlərin idarəsində daha açıq və rəqabətcil bir iqtisadiyyat tərəfdarıdır".

O deyib ki, Trampın liderliyi altında ABŞ-ın dünya səhnəsində yeni bir yanaşma izləyəcəyi gözlənilir:

"Tramp, "dərin dövlət"lərin üstünlük verdiyi güc siyasətindən uzaqlaşaraq, daha çox azad rəqabət, sülh və diplomatiya tərəfdarıdır. Onun bu yeni xətti, yalnız ABŞ-ın daxili iqtisadiyyatında deyil, həm də beynəlxalq arenada dərin dəyişikliklərə səbəb ola bilər.
Zəngəzur Dəhlizi və Yeni Geostrateji Siyasət

Bu yeni güc mərkəzlərinin siyasəti, regionda da əhəmiyyətli təsir göstərə bilər. Trampın rəhbərlik etdiyi bu güclər, Zəngəzur dəhlizi kimi layihələrin həyata keçməsində daha açıq siyasət yürüdə bilər. Bu isə regionda strateji mövqeyə sahib olan layihələrin gerçəkləşməsi üçün daha əlverişli şərait yaradacaq".

Anar Əliyev