Noyabrın 29-da Milli Məclisin İqtisadi siyasət, sənaye və sahibkarlıq komitəsinin payız sessiyasında növbəti iclası keçirilib. İclası açan komitə sədri Azər Əmiraslanov bildirib ki, gündəliyə 2025-ci ilin dövlət büdcəsi zərfinə daxil olan 9 qanun layihəsinin ikinci oxunuşda müzakirəsi daxil edilib. Komitə sədri təklifi ilə gündəlikdəki məsələlərin təqdimatları və müzakirəsi birgə aparılıb.
Newscenter.az xəbər verir ki, iqtisadi siyasət, sənaye və sahibkarlıq komitəsinin sədri birinci oxunuşda dövlət büdcəsi və büdcəyə daxil olan qanun layihələri barədə ətraflı məlumatın verildiyini və sənədlərin müvafiq dövlət orqanlarının rəhbərlərinin və nümayəndələrinin iştirakı ilə Milli Məclisdə konstruktiv və işgüzar atmosferdə geniş müzakirələrinin keçirildiyini deyib.
Bildirilib ki, 2025-ci ilin dövlət büdcəsi və büdcə zərfinə daxil olan layihələr möhtərəm Prezidentin müəyyən etdiyi strateji vəzifələrə və təşəbbüslərə uyğun olmaqla, dövlətimizin gücünü və qüdrətini, sosial siyasətinin effektivliyini, çoxşaxəliliyini bir daha nümayiş etdirir.
Makro-iqtisadi aspektlərdən söz açan komitə sədri qeyd edib ki, cari ildə müşahidə olunan pozitiv makro-iqtisadi meyllər gələn il bizə dövlət büdcəsini səmərəli şəkildə icra etməyə imkan verəcək.
İqtisadiyyat nazirinin müavini Sahib Ələkbərov növbəti büdcə ilinə Azərbaycanın müsbət makro-iqtisadi göstəricilər şəraitində daxil olduğunu deyib. Vurğulanıb ki, iqtisadiyyatın artım və inkişaf meylləri, ÜDM-nin artım templəri, investisiya şəraiti və digər göstəricilər milli inkişaf prioritetlərindən irəli gələn sosial-iqtisadi hədəflərin reallaşdırılması üçün maliyyə təminatı yaradır.
Əmək və Əhalinin sosial müdafiəsi nazirinin müavini Anar Əliyev əhalinin sosial təminatının daha da gücləndirilməsinin Prezident İlham Əliyevin rəhbərliyi ilə həyata keçirilən siyasətin prioritet istiqamətlərindən biri olduğunu diqqətə çatdıraraq ildən-ilə dövlət büdcəsinin sosial yönümlü xərclərinin dinamik olaraq artdığını vurğulayıb.
Qeyd edilib ki, son 5 ildə sosial sahədə aparılmış dərin islahatlar nəticəsində böyük uğurlar əldə edilib. Ölkə başçısının təşəbbüsü və rəhbərliyi ilə 4 böyük sosial islahatlar zərfi icra edilib. Bu sosial islahatlar zərfinin illik xərci 7 milyard manat təşkil edir və 4 milyon vətəndaşımız bu islahatlar zərfindən bəhrələnir.
Büdcənin əsas xərc istiqamətlərindən biri əhalinin sosial müdafiəsi və sosial təminatı ilə bağlı olacaq. Gələn ilin büdcəsində sosialyönümlü xərclərin 8,8 faiz artırılaraq 16,9 milyard manata çatması və dövlət büdcəsi xərclərinin 41 faizini təşkil etməsi sosial siyasətin prioritetliyini ifadə edir.
Bundan başqa əhalinin rifahının yaxşılaşdırılması, yoxsulluğun azaldılması, aztəminatlı ailələrin sosial təminatının gücləndirilməsi məqsədi ilə dövlət büdcəsində kifayət qədər vəsaitlər nəzərdə tutulub. Belə ki, müavinət, təqaüd, kompensasiya ödənişlərinə 1,9 milyard manat, ünvanlı sosial yardım proqramının həyata keçirilməsi üçün 457 milyon manat, haqqı ödənilən ictimai işlər proqramının icrası üçün 200 milyon manat vəsait ayrılıb. Növbəti ildə də əməkhaqqının və minimum pensiyanın artırılması, sosial müavinətlər və təqaüdlər istiqamətində addımların atılması, pensiyaların indeksləşdirilməsi kifayət qədər vəsait nəzərdə tutulub.
Dövlət Vergi Xidmətinin rəis müavini Samirə Musayeva büdcə zərfi çərçivəsində Vergi Məcəlləsinə təklif olunan dəyişikliklərdə investisiya mühitinin və sahibkarlıq fəaliyyətinin təşviq edilməsi, sahibkarlıq subyektlərinin vergi yükünün azaldılması, vergi inzibatçılığının təkmilləşdirilməsi, dövlət-özəl tərəfdaşlığı çərçivəsində iri investisiyaların cəlb edilməsi, sənayeləşmə və nəqliyyat-logistikanın inkişaf etdirilməsi kimi istiqamətlər barədə məlumat verib.
İclasda Maliyyə Nazirliyinin Büdcə şöbəsinin müdiri Fazil Fərəcov büdcə layihəsinin əsas parametrlərini diqqətə çatdırıb, Hesablama Palatası sədrinin müavini Nəsir Sadıqov palatanın 2025-ci ilin dövlət büdcəsinin layihəsinə dair rəyini təqdim edib.
Gündəlikdəki məsələlərin müzakirəsində İqtisadi siyasət, sənaye və sahibkarlıq komitəsi sədrinin müavini Azər Badamov, komitə üzvləri Vüqar Bayramov və Aydın Hüseynov çıxış ediblər. Çıxış edənlər Azərbaycanın 2025-ci il büdcəsinin müstəqillik tariximizin ən böyük büdcəsi olmaqla ərazi bütövlüyümüzün və dövlət suverenliyimizin möhkəmləndirilməsi, əhalinin rifah halının yüksəldilməsi, sosial müdafiəsinin gücləndirilməsi üçün kifayət qədər maliyyə əsasları yaratdığını vurğulayıblar.
Müzakirələrin sonunda gündəliyin 9 məsələsi – “Azərbaycan Respublikasının 2025-ci il dövlət büdcəsi haqqında”, “Dövlət sosial müdafiə fondunun 2025-ci il büdcəsi haqqında”, “İşsizlikdən sığorta fondunun 2025-ci il büdcəsi haqqında”, “Azərbaycan Respublikasında 2025-ci il üçün yaşayış minimumu haqqında”, “Azərbaycan Respublikasında 2025-ci il üçün ehtiyac meyarının həddi haqqında”, Vergi Məcəlləsində dəyişiklik edilməsi haqqında, “Azərbaycan Respublikasının Vergi Məcəlləsində dəyişiklik edilməsi haqqında” Azərbaycan Respublikasının 2021-ci il 3 dekabr tarixli 406-VIQD nömrəli Qanununda dəyişiklik edilməsi barədə, “Nağdsız hesablaşmalar haqqında” Qanunda dəyişiklik edilməsi barədə, “Gömrük tarifi haqqında” Qanunda dəyişiklik edilməsi barədə qanun layihələri ikinci oxunuşda baxılmaq üçün Milli Məclisin plenar iclasına tövsiyə olunub.
İclasda Milli Məclisin deputatları Heydər Əsədov, Məşhur Məmmədov, Tahir Mirkişili, Əlibala Məhərrəmzadə, Rövşən Muradov, Zaur Şükürov və digər rəsmi şəxslər iştirak ediblər.
Süleyman
