
"İkinci dünya müharibəsindən sonra Avropanın gördüyü ən böyük müharibənin, Rusiya - Ukrayna savaşının başlamasından 3 il ötür. Krım alınarkən ruslar düşünürdü ki, Putin sadəcə Nikita Xruşovun vaxtilə Ukraynaya verdiyi bu torpağı geri qaytarır. Ancaq yadıma gəlir, Boris Nemtsov israrla bunun əksini söyləyirdi. Nemtsov 2015-də Kremlin qarşısında dəhşətli şəkildə öldürüldü, onun dediyi nə var idisə hamısı oldu".
Newscenter.az xəbər verir ki, bu fikirləri politoloq Zeynal Əmrəliyev səsləndirib. O deyib ki, Putinin hədəfi təkcə Krım deyilmiş, bu gün Ukraynanın Krımla birlikdə 19,4 faizi rus qoşunun nəzarəti altındadır:
"Putin təkcə Ukraynanı işğal etmədi, həm də Qərb dünyasını parçaladı. Onun Suriya və Ukrayna siyasəti səbəbi ilə Avropa miqrant böhranı ilə üz-üzə qaldı, ənənəvi mərkəzçi partiyalar ciddi tənəzzülə uğradı, radikal sağ sürətli yüksəlişə keçdi. Dünən Almaniyada keçirilən seçkilərdə neofaşistlərin sosial - demokratları geridə qoyaraq ana müxalifət olması ciddi siqnaldır".
Politoloq deyib ki, bu müharibə beynalxalq münasibətlər sistemini alt - üst etdi:
"Artıq getdikcə zəifləyən Avropa, öz dəyərlərindən imtina edən ABŞ, getdikcə güclənən Çin var. Putin bu müharibə ilə Qərb dünyasına çox ağır zərbə vurdu. Şərq ölkələrində ABŞ və Avropaya inam yerlə bir oldu. Ukrayna Qərbə güvənən bütün dövlətlərə acı bir dərs oldu"
Anar Əliyev