Dünyada bir günü tarixə çevirmək, həm də şərəfli tarixə çevirmək, hər kəsə nəsib olmur. O günü yaddaşlarda möhkəmləndirmək və əbədi yaşatmaq, yalnız böyük şəxsiyyətlərin qismətidir. Belə tarixi şəxsiyyətlərimiz çox olub. Əgər o tarix bir dövlətin azadlığı, suverenliyi, bütövlüyü, bir millətin istiqlalı, firavanlığı və üzüağlığı uğrunda yazılıbsa, dövlətin siyasi qüruru və millətin mənəvi qüruru uğrunda atılan addımlar, heç vaxt nankorluqla qarşılanmamalıdır.
Şər, böhtan, şantaj və riyakarlıqla yaşayanlar bu dəyərləri heç vaxt dərk edə bilməzlər. Çünki elə onların özləri tərəfindən dövlətin hər bir uğuru - onların uğursuzluğu, dövlətin qüruru - onların qürursuzluğu, millətin vicdanı isə - onların vicdansızlığı kimi qəbul olunur. Elm bu cür insanların vəziyyətini "şəxsiyyətin deqradasiyası" adlandırır.
Bizim bir dövlətimiz var — bu dövlət bizə babalarımızdan qalan müqəddəs mirasdır. Bu dövlətin güclənməsi, bütövləşməsi və azad olması üçün atılan bütün addımlar vicdanlı vətəndaşlar tərəfindən birmənalı şəkildə dəstəklənməlidir.
Siyasi mübarizə həmişə olub, olacaq da. Və o mübarizənin qaydaları var. O qaydalarda ilk növbədə dövlətin maraqlarına toxunmadan, zədələnmədən istifadə etmək, atdığın bütün addımlarda, qurduğun bütün oyunlarda dövlətə fayda vermək niyyətinin və istəyinin olmasıdır.
Bu gün İlham Əliyev 27 Sentyabr tarixini, 8 Noyabr tarixini və digər tarixləri bizim üçün qürurverici günlərə çevirdi. Bax, bu günlər qərinələr boyu bu millətin yaddaşında önəmli, əhəmiyyətli, qürurlu bir tarix kimi yaşayacaq. Bu tarixi yazanlar — bu milləti, bu dövləti sevənlərdir.
Buna sevinməyən sizlər isə bu dövlətə nadanlıq edib, nankorluq edib, düşmən kəsilənlərsiniz ki, hər cildə girib, hər rola girib, hakimiyyətə olan nifrətinizi dövlətə yönəldən sifariş xəstələrisiniz.Hər cildə girib, hər rola bürünərək hakimiyyətə olan nifrətinizi dövlətə yönəldən sifarişli düşüncə daşıyıcılarısınız. Siz yalnız verilən sifarişləri yerinə yetirməklə məşğulsunuz və bununla da özünüz üçün dərin bir məzar qazırsınız. O məzarlıqda hansı dəhşətlərlə qarşılaşacağınızın fərqində deyilsiniz.
Dövlət düşmənlərinin namərdcəsinə səsləndirdiyi fikirlər, indiki siyasi reallıqlar və prinsiplərlə heç bir şəkildə uzlaşmır. Rusiyada 9 May ilə bağlı baş tutan tədbir kontekstində Azərbaycanın milli maraqları — xüsusilə Qarabağ və digər məsələlərlə bağlı — onların irəli sürdüyü cəfəng fikirlərin əsassız olduğunu göstərir. Cənab Prezidentin apardığı siyasət bir daha sübut edir ki, bu fikirlər mənasız və namərdcəsinə səsləndirilmiş fikirlərdir İlham Əliyev Qarabağ uğrunda, bütün dünyanın ədalətsizliyinə və sizin yaxşı tanıdığınız o qüvvələrin əmrlərinə tabe olduğunuz kəsimə meydan oxudu. Bu, cəsarət, prinsipiallıq və qətiyyət nümunəsi idi. Siz qorxaqlar, köləsiniz, çünki kölələrin şərəf problemi var.
Biz şərəfli tariximizi yazıb, dünyanın şərəf lövhəsində Şanlı Azərbaycanın adını ön sırada həkk etdik.
Bizim dövlətimizin güclənməsi, millətimizin istiqlalı və qüruru uğrunda atılan addımlar, nə qədər sınaqlarla dolu olsa da, bizə əzmkarlıq, vətənpərvərlik və birlik dərsi verir. Əslində, hər bir uğur, hər bir zəfər, hər bir tarixi an, onu yazanların canı, qanı və əzmi ilə bərabər bizim qalibiyyətimizə çevrilir.
Bu gün biz, tariximizin şanlı səhifələrini yazaraq, gələcəyimizin önündə fəxrlə dayanırıq. Unutmayın ki, biz yalnız bu günümüzlə deyil, gələcəyimizlə də fəxr edirik və həmin gələcək, yalnız haqq-ədalət uğrunda mübarizə aparanların yazacağı tarixdir.
Heç vaxt unutmayın ki, şərəfli bir gələcək yalnız özünü və xalqını sevən, dövlətinin müdafiəsini həyatının ən böyük məqsədi bilənlər üçün yazılır!
Ramil Hüseynov, "YENİ XƏTT" siyasi tədqiqatlar mərkəzinin rəhbəri
