Mayın 21-də Belarus Respublikasının Minsk şəhərində “MILEX 2025” Beynəlxalq Silah və Hərbi Texnika Sərgisi işinə başlayıb.

Newscenter.az xəbər verir ki, tədbirdə Azərbaycan Respublikasının müdafiə sənayesi naziri Vüqar Mustafayevin rəhbərlik etdiyi nümayəndə heyəti iştirak edir.
Belarus, Rusiya, İran, Çin, Pakistan, Birləşmiş Ərəb Əmirlikləri və Hindistandan 126 şirkətin iştirak etdiyi sərgidə zirehli maşınlar, raket, artilleriya, atıcı silahlar, döyüş sursatları, optik-elektron avadanlıq və sistemlər, kimyəvi və bioloji mühafizə avadanlıqları, aviasiya və raket sistemləri və s. nümayiş etdirilir.

İki ildən bir təşkil edilən tədbirin açılış mərasimindən sonra nazir V.Mustafayev sərgi ilə tanış olub.

Nazir sərgi çərçivəsində Belarus Respublikasının Dövlət Hərbi Sənaye Komitəsinin sədri Dmitri Pantus ilə görüşüb.

Görüşdə beynəlxalq müdafiə sərgilərinin keçirilməsinin əhəmiyyəti vurğulanaraq, belə tədbirlərin dünyada müdafiə sənayesi sahəsində baş verən yeniliklərlə tanış olmaq üçün unikal imkanlar yaratdığı qeyd olunub.

Daha sonra iki ölkə arasında müdafiə sənayesi sahəsində əlaqələrin daha da inkişaf etdirilməsi istiqamətində fikir mübadiləsi aparılıb.

Qeyd edək ki, “MILEX 2025” Beynəlxalq Silah və Hərbi Texnika Sərgisi mayın 24-də başa çatacaq.

Süleyman