Həyat bəzən sənin qarşısına görünməz bir divar kimi çıxır. Sənin nə etdiyini soruşmur, nə üçün döyüşdüyünü anlamır, sadəcə sınayır. Mənim həyatım da elə divarların, sınaqların içindən keçdi, amma mən dayandım, qırılmadım, bəzən acı ilə qışqırdım, amma heç vaxt prinsiplərimdən dönmədim. Mənim həyatım təkcə bir ömür deyil, bu, öz haqqım uğrunda döyüşün, vicdanla yaşamanın, acılarla yoğrulmuş bir gücün hekayəsidir.
Uşaqlığım Gəncədə keçdi, amma damarlarımda Dərələyəzin dağ havası axır. Mən o torpağın, o kökün, o dağların verdiyi gücü uşaqlıqdan hiss etdim. Sadə və kasıb bir ailədə böyümüşəm, amma böyük ideallarla. Ailəm mənə öyrətdi ki, “oğul, insanı dəyəri pul və şöhrət deyil, vicdanı və düzlüyü müəyyən edir.” Bu sözlər mənim həyat kitabımın ilk səhifəsi oldu. Hər çətinlik, hər maneə məni qorxutmadı, əksinə, məni möhkəmləndirdi və iradə verdi. Gənclik illərimdə dünyanı dəyişmək istədim. Hər kitab, hər dərs, hər qanun mənim içimdə bir od yandırdı. Mən hüquq sahəsini seçdim, çünki mənim üçün ədalət sadəcə bir anlayış deyil, yaşamaq tərzi idi. İki universiteti fərqlənmə ilə bitirdim, magistr təhsili aldım, amma ən böyük məktəb həyatın özü oldu. Hər uğur məni gücləndirdi, hər xəyanət məni oyatdı. Mən öyrəndim ki, insanın ən böyük sınağı yalnız haqsızlıq və xəyanət içində ortaya çıxır.
İş həyatıma başladığımda anladım ki, bu gün ədalət nadir bir mücərrəd anlayışdır. Bəziləri qanunları öz maraqlarına görə əyir, bəziləri isə haqqı tapdalayaraq yüksəlir. Mən isə susmadım. Mənim üçün susmaq rahatlıq, amma vicdanımı itirmək ölümdən betər olardı. Hər dəfə mənə qarşı edilən haqsızlığa qarşı çıxanda, hər dəfə ədalətin yanında duranda başımı dik tutdum. Çünki bilirdim ki, susmaq asandır, amma bu mənlik deyil.
Həyatımın ən acı anları isə insanlardan gəldi. Etibar etdiyim insanlar, dost dediklərim, güvəndiyim rəhbərlərim, qardaş bildiklərim bir gün dönüb arxamı çevirdi, bəzən isə ən dərin zərbəni vurdu. O anda mən başa düşdüm ki, insanı yıxan zərbə düşməndən gəlmir, etibar etdiklərindən gəlir. Amma mən sarsılmadım. Hər xəyanət mənə dərs oldu, hər itki mənim gücümü artırdı. Mən öyrəndim ki, səni öldürməyən acılar səni daha da möhkəmləndirir.
İllər keçdikcə gördüm ki, bəzi insanlar yalanla, yaltaqlıqla yüksəlir, amma onların ucalığı boşluq üzərində qurulub və bir gün sarsılacaq. Mən isə öz yolumu seçdim, tək qalsam da, düz qalmaq. Çünki bilirdim ki, vicdanın sükutu, haqqın səssizliyi hər zaman qalıcıdır.
44 günlük Vətən müharibəsi mənim üçün həm acı, həm də şirin bir dövr oldu. Ön cəbhədə deyildim, amma arxa cəbhədə Vətən üçün hər şeyimi verdim. Şəhid ailələrinin göz yaşları, qazilərin fəryadı, ehtiyacı olanların baxışları mənim vicdanımı oyatdı. Mən o insanların dərdini təkcə sənədlərdə yox, qəlbimdə daşıdım. Hər bir baxış mənə xatırlatdı ki, bu yol çətindir, amma doğru yoldur.
Həyatımda çox şey itirdim, dostları, illüziyaları, bəzən də səbrimi… Amma qazandığım bir şey var, özüm və prinsiplərim. Mən artıq kim olduğumu, nə üçün yaşadığımı və kimin tərəfində olduğumu bilirəm. Mən haqqın, ədalətin, vicdanın və Vətənin tərəfindəyəm.
Bəli, mən sərtəm. Amma bu sərtlik qəzəb deyil, prinsipdir. Mən sərtliyimi qurbanlıq kimi deyil, öz haqqımın qorunması üçün zəruri bir qalxan kimi görürəm. Mənim gözümə baxan hər kəs bilir ki, o baxışda nə riyakarlıq, nə qorxu, nə də yaltaqlıq yoxdur. Mənim yolum tək deyil, amma doğru yoldur, haqqın, vicdanın və əqidənin yoludur. Bu ömür mənə öyrətdi ki, həyatda ən böyük zənginlik vicdanla yaşamaqdır, ən böyük qələbə isə haqq yolunda tək qalmaqdır. Mən yaşadım, sınadım, ağladım, döyüşdüm, amma heç vaxt düzlüyümü itirmədim.
Həyatım bəzən qəhvə kimi oldu, acı, bəzən yandıran, amma sonda şirinliyi ilə ruhu oyandıran. Mən o acını sevdim. Hər yara mənə bir dərs oldu, hər zərbə mənim gücümü artırdı. Mən öyrəndim ki, həyatın həqiqi dadı acının içindən doğan gücdədir. İndi geriyə baxanda görürəm, keçdiyim yol çətin, amma mən o çətinliyin içində öz heykəlimi yonmuşam. Mənim həyatım təkcə yaşanmış bir ömür deyil, bu, bir mübarizə məktəbidir. Mən o məktəbdə öyrəndim ki, haqqı qorumaq, vicdanla yaşamaq və Vətən üçün işləmək hər çətinliyə dəyər.
Bu, mənim qısa hekayəmdir. Acılı, şirin, sarsılmaz və şərəfli bir ömür hekayəsi. Mənim həyatımın hər səhifəsi bir dərs, hər zərbə bir addım, hər itki isə bir qələbədir. Mən o addımlarla ucaldım. Mənim yolum haqqın yoludur və mən bu yolu davam etdirəcəyəm.
Əli İbrahimov
