Amerika hakimiyyəti 1912-ci ildə batan Titanik gəmisindən olan artefaktların satışı üçün hərracın keçirilməsinə qarşı çıxıb. Bu barədə Associated Press (AP) məlumat yayıb .

Batmış gəmidən artefaktları bərpa etmək üçün eksklüziv hüquqlara malik olan RMS Titanic şirkəti bəzi əşyaları satmaq istəyir. Lakin Associated Press-in qeyd etdiyi kimi, şirkət əvvəllər Atlantik okeanının dibindən çıxarılan əşyaların yalnız muzeylərdə və səyyar sərgilərdə nümayiş etdiriləcəyinə razılıq vermişdi. İndi RMS Titanic şirkəti Titanik sərnişinlərinin və heyətinin şəxsi əşyalarını, mətbəx əşyalarını və dekorativ əşyalarını hərraca çıxarmağı planlaşdırır.

ABŞ Milli Okean və Atmosfer Administrasiyası (NOAA) artefaktların potensial satışının hökumətin RMS Titanik ilə bağladığı müqaviləni pozduğunu hesab etdi. Agentlik hərracın dayandırılması üçün məhkəmə qərarı tələb edərək məhkəməyə müraciət etdi.