Əziz media nümayəndələri,
Sizi zəngin və şərəfli tarixə malik Milli Mətbuatımızın 151 illiyi münasibətilə səmimi qəlbdən təbrik edirəm.
Həqiqətən də Azərbaycan mətbuatı ötən illərdə üzərinə düşən vəzifəni çox layiqincə yerinə yetirib.
Milli Mətbuatımız sadəcə xəbərləri cəmiyyətə çatdıran informasiya vasitəsi deyil, xalqımızın düşüncə tarixini yazan salnaməçi, ictimai rəyin formalaşdırıcısı, milli ideyaların daşıyıcısı, dövlətlə vətəndaş arasında etibarlı körpü və cəmiyyətin inkişaf istiqamətlərini müəyyənləşdirən mühüm ictimai institut kimi tanınıb.
Sözsüz ki, azad sözün, medianın inkişafında yaradılmış mühit də bu sahənin inkişafında mühüm rol oynayıb. Ulu öndər Heydər Əliyevin mətbuata dəstəyi,
Prezident İlham Əliyevin yüksək diqqət və qayğısı medianın peşəkar fəaliyyətinə təkan verib.
Söz dünyanı dəyişmək gücünə malik sərrast silahdır, Media böyük bir ordudur.
İnformasiya vasitələri, peşəkar media təkcə xəbərləri operativ çatdırmaq funksiyasını yerinə yetirmir, cəmiyyəti düzgün istiqamətləndirir, dövlətin milli maraqlarını qoruyur.
Biz bunun Birinci Qarabağ müharibəsi və 44 günlük Vətən müharibəsi və sonrakı dövrdə şahidi olmuşuq. Qarabağ savaşı başlayandan həyatlarını riskə ataraq ən qaynar döyüş xətlərindən operativ və düzgün informasiya verməklə, reportajlar hazırlamaqla cəmiyyətimizi dolğun məlumatlarla təmin edirlər. Alı Mustafayev, Salatın Əsgərova, Çingiz Mustafayev, Kazımağa Kərimov kimi şəhid jurnalistlərimiz həm də qəhrəmanlarımızdır.
Zəfər savaşı dövründə jurnalistlərimiz öz həyatlarını risk altına qoyaraq ilk günlərdən qələm və kameralarını süngüyə çevirərək ən qaynar atəş nöqtələrindən operativ məlumatları tamaşaçılarımıza, izləyicilərimzə çatdırırdılar, onlar da vahid məqsəd uğrunda səfərbər olaraq informasiya müharibəsində erməniləri məğlub etdilər.
Bütün bunlar bir daha təsdiqləyir ki, obyektiv və qərəzsiz informasiya, peşəkar media cəmiyyətin həyatına çox mühüm təsir göstərir.
Sizə hər zaman maraqlı xəbərlər çatdırmağı arzulayır, tükənməz enerji, möhkəm cansağlığı və peşə fəaliyyətinizdə yüksək nailiyyətlər diləyirəm
Sözünüz həmişə kəsərli, qələminiz iti və həqiqətin carçısı olsun!
Əziz jurnalistlər, Bayramınız mübarək!

Vaqif Abdullayev, siyasi elmlər doktoru, professor