Azərbaycan Respublikasının Prezidenti, Müzəffər Ali Baş Komandan İlham Əliyevin sarsılmaz siyasi iradəsi, uzaqgörən strategiyası və rəşadətli Azərbaycan Ordusunun sarsıdıcı gücü sayəsində Qubadlı düz 27 illik əsarətdən sonra öz azadlığına qovuşdu. Dövlət başçısının Sərəncamı ilə məhz bu tarixin Qubadlı Şəhəri Günü kimi elan edilməsi, qazanılan böyük Zəfərə, şəhidlərimizin əziz xatirəsinə və xalqımızın milli qüruruna verilən ən ali dəyərdir.
Qubadlının azadlığı sadəcə bir coğrafi ərazinin geri qaytarılması deyil, sıldırım qayalarda yazılan bir qəhrəmanlıq dastanı idi. Həkəri və Bərgüşad çaylarının vadisində, keçilməz relyefdə düşmənin onilliklər boyu qurduğu istehkamları darmadağın edən Azərbaycan əsgəri dünyaya hərbi strategiyanın ən mükəmməl nümunəsini nümayiş etdirdi. Ali Baş Komandanın hər bir müraciəti ordumuzu daha böyük qələbələrə səsləyən zəfər marşına çevrildi. Bu gün Qubadlı səmasında dalğalanan üçrəngli bayrağımız xalqımızın yenilməzliyinin və dövlətimizin qüdrətinin rəmzidir.
Bu gün Qubadlı Şəhəri Günü sadəcə bir bayram deyil; bu gün Ali Baş Komandanın dəmir yumruğunun, Azərbaycan Ordusunun sarsılmaz ruhunun və xalqımızın Böyük Qayıdış coşqusunun təntənəsidir. Qubadlı artıq viranəlikdən çıxıb, cənab Prezidentin birbaşa diqqəti altında yenidən qurulan, müasirləşən və gələcəyə addımlayan bir dirçəliş mərkəzidir. Şəhər günün mübarək, ey rəşadətli ordumuzun bizə bəxş etdiyi azad Qubadlı!

Zülfiyyə Bayramlı
YAP Yevlax rayon təşkilatının fəalı