Çərşənbə, 1 dekabr 2021, 23:17:05  
Sizin Reklam Burada.

Polis son 6 gündə 110 kq-a yaxın narkotiki qanunsuz dövriyyədən çıxarıb



Newscenter.az.7.01.2021. Respublikanın daxili işlər orqanları ümumən cinayətkarlığa, o cümlədən narkotik vasitələrin qanunsuz dövriyyəsinə qarşı mübarizə tədbirlərini uğurla və qətiyyətlə davam etdirirlər.

Bu barədə Daxili İşlər Nazirliyinin (DİN) Mətbuat xidmətindən məlumat verilib.

Bu istiqamətdə həyata keçirilən əməliyyat-axtarış tədbirləri nəticəsində cari ilin təkcə 6 günü ərzində güclü təsiredici xüsusiyyətə malik, ümumi çəkisi 106 kiloqram 500 qram olan müxtəlif növ narkotik vasitə, o cümlədən 50 kiloqram 500 qram heroin, 50 kq-dan çox marixuana və 4 kq-a yaxın metamfetamin götürülərək qanunsuz dövriyyədən çıxarılıb.

Qeyd edək ki, ötən gün ərzində Baş Narkotiklərlə Mübarizə İdarəsinin əməkdaşları tərəfindən həyata keçirilən uğurlu əməliyyat tədbirləri nəticəsində ümumi çəkisi 21 kq-dan çox olan narkotik vasitənin qanunsuz dövriyyəsinin qarşısı alınıb.

Belə ki, BNMİ əməkdaşlarının daxil olmuş məlumat əsasında keçirdikləri əməliyyat tədbirləri nəticəsində narkotiklərin qanunsuz dövriyyəsində şübhəli bilinən Gəncə şəhər sakini İ.Verdiyev şəhər ərazisində saxlanılıb. Ona məxsus BMW markalı avtomobilə baxış zamanı 10 kiloqramdan artıq heroin götürülüb.

Baş İdarə əməkdaşlarının keçirdikləri növbəti əməliyyat tədbirləri nəticəsində Yevlax rayon sakinləri, əvvəllər məhkum olunmuşlar - S.Məmmədov və M.Namazov saxlanılıblar. Şəxsi axtarış zamanı S.Məmmədovdan 1,2 kq marixuana, M.Namazovun evindən isə 10 kq 350 qram marixuana götürülüb.

Daha bir əməliyyat tədbiri nəticəsində Abşeron rayonu, Aşağı Güzdək qəsəbə sakini, əvvəllər məhkum olunmuş Z.Şahverdiyevin evinə baxış zamanı 25 kq-dan artıq marixuana aşkar edilib.

Biləsuvar Rayon Polis Şöbəsi əməkdaşlarının əldə edilən məlumat əsasında keçirdikləri uğurlu əməliyyat tədbiri nəticəsində isə əcnəbi vətəndaş saxlanılılıb.

Ətrafında aparılan tədbirlərlə onun qaçaqmalçılıq yolu ilə gətirdiyi narkotik vasitələri gizlətdiyi yer müəyyən edilib.
Davam etdirilən əməliyyat-axtarış tədbirləri nəticəsində onun gizlətdiyi 22 kq 30 qram heroin, 2 kq 630 qram metamfetamin, 1 kq 450 qram metadon və tramadol həbləri polis əməkdaşları tərəfindən həmin yerdən aşkar edilərək götürülüb.

Saxlanılan şəxslər maddi sübutlarla birgə istintaqa təhvil veriliblər. Faktlarla bağlı Cinayət Məcəlləsinin müvafiq maddələri ilə cinayət işləri başlanılıb, zəruri istintaq və əməliyyat-axtarış tədbirləri aparılır.
Xəbəri paylaş