Binəqədi rayonu, Xocasən qəsəbəsinin bir qrup sakini Baş Dövlət Yol Polisi İdarəsi və Bakı Nəqliyyat Agentliyindən Azərbaycan Respublikasının Prezidenti İlham Əliyevə müraciət edib. Newscenter.az olaraq həmin müraciəti təqdim edirik:
Hörmətli cənab Prezident!
Biz ərizəçilər, Bakı şəhər Binəqədi rayon Xocasən qəsəbəsi Həmid Sultanov küçəsində yaşayırıq. Belə ki, Xocasən-Lökbatan yolundan işıqfordan hərbi hissəyə qalxan yolun (Həmid Sultanov küçəsi) təqribəm 100 metrliyində dəfələrlə qəzalar baş vermişdir. Sonuncu qəza 12 noyabr 2022-ci ildə Həmid Sultanov küçəsi 17-də baş vermişdir. Xoşbəxtlikdən həmin zaman yolda adam olmadığına görə qəza zamanı insan tələfatı olmamış, sadəcə olaraq maşın obyektin və yaşayıç evinin çəpərinin bir hissəsini dağıtmışdır. Lakin bu o demək deyil ki, bir daha qəza olarsa mütləq olaraq insan tələfatı olmayacaq. Belə ki, Həmid Sultanov küçəsində radar, tramplin, yol nişanı və.s olmadığına görə burada avtomobillər yüksək sürətlə idarə olunur. Belə olan halda qəzalar qaçınılmaz olur. Həmid Sultanov küçəsinin sağı da solu da yaşayış evləridir və qadağa edici heç bir yol hərəkət nişanı belə yoxdur. Hətta piyada səkisi belə yoxdur, yəni qapını açıb birbaşa yola çıxırsan.
Yolun sağ və sol hissəsinin yaşayış evləri olmasına baxmayaraq burada avtomobillər 80-90 hətta 100km/saat sürətlə hərəkət edirlər. Bizim hər birimizin evində azyaşlı və dərsə gedən uşaqlar var. Belə olan halda təbii ki, hər birimiz çox
narahat oluruq. Lakin Baş Dövlət Yol Polis İdarəsi və Bakı Nəqliyyat Agentliyi heç də narahat deyil. Hər iki qurum problemin həllini bir-birinin üzərinə “ataraq” həll etmək istəmirlər. Belə olan halda biz vətəndaşlar nə etməliyik?
Bu məsələ ilə bağlı olaraq 28.12.2022-ci il tarixində Baş Dövlət Yol Polis İdarəsinə müraciət etmişik və müraciətimizi yönəldiblər Binəqədi rayon Polis İdarəsinə. Binəqədi RPİ-dən guya ki, kimlərsə gəlib baxış keçirib. Bu necə baxış keçirməkdir ki, bundan biz ərizəçilərin heç birinin xəbəri belə yoxdur. Bunlar bizi insan yerinə qoymur! Gəlib baxış keçirirlər, çox sağ olsunlar lakin bizimlə əlaqə saxlayıb şikayətimizin dəqiq hansı ərazidən bəhs etdiyini öyrənməli idilər. Bu günə qədər də həmin ərazidə heç bir tədbir görülməyib. Çünkü özləri guya gəlib baxıblar və qərar verib gediblər. Biz şikayətçilər də qalmışıq kənarda. Bizim şikayət etdiyimiz əraziyə baxan belə olmayıb, bu günə qədər də bu ərazidə heç bir tədbir görülməyib.
Hörmətli cənab Prezident!
Bizim artıq bir əlacımız var, yığışıb yolu kəsib etiraz etmək. Gərək burda kimsə ölə ki, Baş Dövlət Yol Polisi İdarəsi və Bakı Nəqliyyat Agentliyi bir tədbir görə?!
Bunlar kiminsə ölməyini gözləyirlər?! Bu qədər də haqsızlıq olmaz axı. Altı aydır şikayət edirik bizi süründürürlər. Bu işə kim baxır? Nəyə görə vəzifələrini icra etmirlər? Nəyə görə bu qədər insanın hüquqları pozulur? Ombudsmanın Aparatına bununla bağlı dəfələrlə şikayət ərizəsi yazmışıq zənglər etmişik lakin onlar da bu işin öhdəsindən gələ bilmir. Nəyi gözləyirlər axı, kiminsə ölməyinimi? Sonuncu qəzada bir insan ölsə idi necə olacaqdı?
Sizdən xahiş edirik bu məsələni həlli üçün aidiyyat qurumlara öz tapşırığınızı verəsiniz. Çünkü altı aydan çoxdur ki, müraciətimizə Baş Dövlət Yol Polis İdarəsi və Bakı Nəqliyyat Agentliyi baxmır və gözləyirlər ki, burda kimsə ölsün sonra gəlib baxsınlar. Media nümayəndələrindən xahiş edirik müraciətimizi medaiada işıqlandırılsın ki, cənab Prezidentin bu məsələdən xəbəri olsun. Müraciətimizlə əlaqədar sənədləri məktuba əlavə edirik. Cənab Prezidentdən xahiş edirik bizə öz köməkliyini göstərsin. Öncədən təşəkkür edirik.
İmzalar: Daşdəmirov Fərhad Bayram oğlu
Hüseynov Pərviz Əsəddin oğlu
Abdurahmanov Elxan Tofiq oğlu
Nəsrullayev Ceyhun İnqilab oğlu
Abıyev Vidadi Razim oğlu
Mustafayev Vüsal Aydın oğlu
Abdurahmanov Elman Tofiq oğlu
Məmmədov Fikrət Talıb oğlu
Cahangirov Şubər Yağub oğlu
Nəcəfova Müşkünaz Baxış qızı
NEWSCENTER.AZ
