Əfqanıstan Hökumətinin İnformasiya Mərkəzində Da Afghanistan Breshna Sherkat (DABS) şirkəti ilə Özbəkistan arasında dörd elektrik enerjisi layihəsi üzrə müqavilələr imzalanıb. Bu barədə Əfqanıstan baş nazirinin iqtisadi məsələlər üzrə müavininin mətbuat xidməti məlumat yayıb.
Tədbirdə Əfqanıstan baş nazirinin iqtisadi məsələlər üzrə müavini Molla Əbdül Qani Barodar Axund və Özbəkistanın energetika naziri Jurabek Mirzamahmudov iştirak ediblər.
Əsas layihələr:
gücü 1000 MVt, 500 kV olan Surxan-Dəşt-Əlvan elektrik verilişi şəbəkəsinin tikintisi;
800 MVA gücündə Arqandi yarımstansiyasının genişləndirilməsi;
gücü 800 MVt, 220 kV olan Kabil-Şeyx Mesri elektrik ötürücü şəbəkəsinin tikintisi;
Nangarhar Şeyx Mesri yarımstansiyası, gücü 126 MVA.
Özbəkistanın yatırdığı investisiyaların ümumi həcmi 243 milyon ABŞ dollarına yaxındır. Layihələr 18 ay müddətinə nəzərdə tutulub.
Tikinti başa çatdıqdan sonra Əfqanıstan Özbəkistandan 800-1000 meqavat elektrik enerjisi ala biləcək və Əfqanıstanın enerji təhlükəsizliyini əhəmiyyətli dərəcədə gücləndirəcək.