Ekvador prezidenti Daniel Noboa Kanar əyalətində tədbirə gedərkən etirazçılar onun kortejinə hücum ediblər. Prezidentin mətbuat xidməti həbs olunanların adam öldürməyə cəhddə ittiham olunacağını bildirib.

"Prezident korteji səfər zamanı aqressiv şəxslərin hücumuna məruz qalıb, onun gəlişinə mane olmağa cəhd edib. Lakin onlar onun vətəndaşlar qarşısında öhdəliklərini yerinə yetirməsinə mane ola bilməyiblər", - məlumatda deyilir.

Mətbuat xidmətinin məlumatına görə, “saxlanılanların hamısı terrorizm və adam öldürməyə cəhddə ittiham olunacaq”. Hadisəyə baxmayaraq, Noboa planlaşdırdığı tədbirləri ləğv etməyib.

Primicias portalının məlumatına görə , etirazçılar prezidentin kortejinə daş atıblar. Energetika, Mədən və Ətraf Mühit naziri İnes Manzano bildirib ki, dövlət başçısını daşıyan avtomobildə “güllə izləri” də görünür.

Ekvadorda yol maneələri və toqquşmalarla müşayiət olunan etirazlar prezident 12 sentyabrda dizel yanacağının subsidiyalarını ləğv edən fərman imzaladıqdan sonra başlayıb. Bunun ardınca qiymətlər bir qallon (3,78 litr) üçün 1,80 dollardan 2,80 dollara yüksəlib. Bir sıra əyalətlərdə fövqəladə vəziyyət elan edilib.