“Son günlər aparılan istintaq və mediada yayılan məlumatlar göstərir ki, hazırkı proses yalnız 2025‑ci ildə baş vermiş hadisələrə bağlı deyil — hələ 2012–2013-cü illərdən planlaşdırılan daha geniş, xaricdən maliyyələşdirilmiş və xarici təsir kanallarına bağlı siyasi sxemin tərkib hissəsidir. Məlumdur ki, birbaşa Ruisya tərəfindən formalaşdırılmış “Milyarderlər İttifaqı” adlı qurum özündə diaspor, biznes və maliyyə sektorunda olan ayrı-ayrı şəxsləri birləşdirirdi. Bu ittifaq çərçivəsində 2013‑cü ildə, yəni ölkədə Prezident seçkiləri ərəfəsində “vahid müxalifət bloku”nu formalaşdırmaq və “vahid namizəd” meydana çıxarmaq planı var idi. Həmin ərəfədə ölkədə Milli Şuranın yaradılması da bu planın həyata keçirilməsi üçün siyasi təməli formalaşdırmağa hesablanmışdı”.

Newscenter.az xəbər verir ki, bunları politoloq Yusif Bağırzadə deyib. O bildirib ki, indi Əli Kərimlinin, yəni Milli Şuranın əsas simasının “Mehdiyev işi” ilə bağlı istintaqa cəlb olunması tamamilə başa düşüləndir:

“Aparılan axtarış zamanı Əli Kərimlinin evindən “Milyarderlər İttifaqı ilə əlaqəli materiallar”, eyni zamanda Ramiz Mehdiyev tərəfindən yazıldığı iddia olunan məktubun ilkin redaktə variantının tapılması da Ramiz Mehdiyev mərkəzli şəbəkə ilə Əli Kərimli arasında birbaşa əlaqəyə dair ehtimalları artırır.
Əli Kərimli və digərlərinin istintaqa cəlb olunması və evlərində axtarışın aparılması, bu əlaqələrin yalnız keçmişdə qurulmuş əlaqələrin ifşası baxımından deyil, eləcə də hazırkı siyasi təhlükəsizlik zərurətindən, yəni xarici təsir cəhdlərinə qarşı müdafiə strategiyasının qurulmasından irəli gəlir”.
Politoloqun sözlərinə görə, görünən odur ki, Milyarderlər İttifaqı–Mehdiyev–Kərimli üçbucağı statusu hipotetik olmaqdan çıxaraq istintaqın mərkəzində duran real versiyaya çevrilib:

“Bu ittihamların sübut olunması isə xaricdən maliyyələşdirilmiş və geosiyasi maraqlarla bağlı şəbəkələrin ölkə daxilində siyasi kanalları manipulyasiya etmə cəhdlərinin ifşası və dövlət təhlükəsizliyinin müdafiəsində mühüm addım olacaq.

Eyni zamanda bu proses dövlət siyasətinin milli təhlükəsizlik prioritetləri üzərində yenidən qurulduğuna dair güclü siqnal kimi də qəbul oluna bilər. Köhnə klanların, xarici bağlı qrupların ifşası cəmiyyət və dövlət üçün daha açıq, şəffaf siyasi mühitə doğru istiqamət götürülməsi baxımından olduqca önəmlidir.

Yekun olaraq — bu, sadəcə bir cinayət işi deyil. Bu Azərbaycanda uzun illərdən bəri davam etmiş xarici təsir və şəbəkə kanalları ilə siyasi manipulyasiyaların sistemli yoxlanışı, dövlət suverenliyi və siyasi təhlükəsizliyin prioritetləşdirilməsi prosesidir”.

Süleyman