"Son həftələr ərzində Ukraynanın Rusiyanın sənaye şəhərlərinndə yerləşən neft anbarları, eləcə də digər bu kimi strateji obyektlərinə güclü zərbələr endirməsi Rusiyanı ciddi yanacaq böhranı ilə üzləşdirib. Hər nə qədər Rusiya rəsmiləri bunu etiraf etməsələr də, yanacaqdoldurma məntəqələrində müşahidə edilən uzun növbələr, qənaət rejimi ilə bağlı ruslara edilən çağırışlar mənzərəni aydın şəkildə ortaya qoyur".

Newscenter.az xəbər verir ki, bunları politoloq Arzuman Muradlı deyib. Onun sözlərinə görə, sözügedən strateji obyektlərə davam edən hücumlar fonunda Rusiya Prezidenti Vladimir Putinin müvafiq qurumların rəhbərləri ilə iclas keçirməsi və konkret tapşırıqlar verməsi Ukraynanın hücumlarının hətta Kremldə ciddi təşviş yaratdığını deməyə əsas verir:

"Ukraynanın Rusiyanın yanacaq obyektlərinə ardı-arası kəsilməyən hücumları demək olar ki, müharibənin gedişini dəyişib və Rusiya faktiki olaraq Ukraynanın hava zərbələri qarşısında aciz duruma düşüb. Elə bu səbəbdəndir ki, indi Rusiyada daha çox sülh danışıqları gündəmə gəlir. Ukraynanın bu cür zərbələri davam etsə, Rusiya öz aqressiyasından geri çəkilib bərabər şərtlər əsasında Ukrayna ilə danışıqlar masasına oturacaq və işğal etdiyi Ukrayna ərazilərini tərk etmək məcburiyyətində qalacaq".

Arzuman Muradlı qeyd edib ki, hər şey Kiyevin bundan sonrakı davranışından, eləcə də Avropanın Ukraynaya yardımlarında asılı olacaq.

Süleyman