Çərşənbə, 1 dekabr 2021, 23:17:05  
Sizin Reklam Burada.

Ailədə bir avtomobil varsa, onu sürmək üçün ər və arvadın hansı hüquqları var?

Ailədə bir avtomobil varsa, onu sürmək üçün ər və arvadın hansı hüquqları var?


Bir qayda olaraq ailədə müəyyən mübahisəli məsələlər meydana çıxır ki, onu da həll etmək üçün müəyyən maarifləndirici hüquqi biliklərin verilməsi vacibdir. Belə mübahisəli məsələlərdən biri də ailə üzvlərindən birinin olan avtomobilin digər üzvlər tərəfindən necə idarə edilə biləcəyidir. Ona görə də bəzən haqlı olarq bu kimi suallar ortaya çıxır ki, ailədə bir avtomobil varsa, onu sürmək üçün ər və arvadın hansı hüquqları var? Etibarnamə hansı halda təqdim olunmaya bilər? Ümumiyyətlə avtomobil qadın və ya kişinin adınadırsa, digəri etibarnamə olmadan bu avtomobili sürə bilərmi?

Newscenter.az xəbər verir ki, bu və ya digər suallara hüquqşünas Əli İbrahimov aydınlıq gətirib. O bildirib ki, avtomobilin qeydiyyat şəhadətnaməsi kişinin (qadının) adınadırsa, həmin avtomobili digəri etibarnaməsiz sürə bilər:

"Əgər avtomobil ailədən olmayan başqa birinin adınadırsa və ər və ya arvaddan birinin adına verilmiş etibarnamə varsa, həmin avtomobili etibarnamə olmayan digəri sürə bilməz. Etibarnamə mütləq hüququn olmadığına görə müəyyən müddətə verilən sənəddir. Qadın və ya kişidə yalnız etibarnamə varsa, digəri hər ikisi avtomobildə olduğu zaman etibarnaməsiz sürə bilər".

Hüquqşünas hesab edir ki, nikah şəhadətnaməsi ər-arvad üçün həm də etibarnamədir:

"Əgər ər və arvadın nikah şəhadətnaməsi varsa, etibarnamə olmadan ikisi də digərinin avtomobilini sürmək hüququna malikdir Ailə məcəlləsinin 32-ci, mülki məcəllənin 225-ci maddələrinə əsasən ər və arvadın birgə nikah dövrlərində əldə etdikləri bütün əmlaklar hər ikisinə aiddir. Qeydiyyat şəhadətnaməsində onlardan birinin adı varsa, o biri də sürə bilər. Bu hüquq ailə üzvlərindən yalnız ər-arvada aid edilir. Bu hüquq övlad üçün keçərli deyil. Bunu sübut etmək üçün sənəd tələb olunduğu zaman nikah şəhadətnaməsi təqdim edilməlidir. Qeyd edim ki, təkcə nikah şəhadətnaməsənin göstərilməsi kifayət etmir. Avtomobil nikah bağlanmamışdan öncə alınıbsa və onun ümumi mülkiyyət hüququ yoxdursa, notarial qaydada təsdiq edilən daşınan əmlakın ümumi mülkiyyət hüququna malik olmasını göstərən sənəd olmalıdır".

Əli İbrahimov onu da qeyd edib ki, etibarnaməsi olmadan avtomobili sürən şəxs qaydaları pozduğu halda yol polis müfəttişi saxlayıbsa, avtomobili kim sürürsə, cərimə həmin şəxsin üzərinə yazılır:

"Amma kameralardan müəyyən olunub elektron qərar gəldikdə DYP-nin mərkəzi informasiya sistemində istifadəçi kimi kimin adı qeyd olunubdursa, cərimə onun adına göndərilir. Əgər həmin qərardan sonra adına cərimə yazılan şəxs şikayət yazaraq sükan arxasında olmadığını müəyyənləşdirsə, həmin şikayət əsasında onun adına olan cərimə ləğv olunub faktiki olaraq sürən şəxsin adına yeni qərar tərtib edilir".

Mehman