Qara dənizdə ticarət gəmilərinə artan hücumlar fonunda Türkiyə biznes assosiasiyalarının nümayəndələri təhlükəsiz dəniz dəhlizlərinin yaradılmasına çağırıblar.

Newscenter-az xəbər verir ki, bu barədə "Ekonomim biznes" qəzeti yazıb

"Bir çox malın daşınmasında ciddi fasilələr qeydə alınıb. Kömürün dollarla qiyməti artıq təxminən 40% artıb. Oxşar risk taxıl və gübrələr üçün də mövcuddur", - deyə nəşr yazır.

Samsun Qara dəniz Vilayəti Sənayeçiləri və Sahibkarlar Assosiasiyasının rəhbəri Ferşat Eldemir nəşrə bildirib ki, bu, artıq ayrı-ayrı gəmiçilik şirkətlərinin üzləşdiyi logistika problemləri deyil, regional və Türkiyə iqtisadiyyatına təsir edən strateji risklər məsələsidir:

"Bu, Qara dəniz hövzəsinin bütün sahil ölkələrinə aiddir. Gəmiçilikdə fasilələr davam edərsə, əsas resursların, ilk növbədə enerji, taxıl və gübrələrin qiymətlərinə əlavə təzyiq qaçılmazdır. Buna görə də, Qara dənizdə ticarət gəmilərinin təhlükəsizliyini təmin etmək üçün mümkün qədər tez beynəlxalq mexanizmin yaradılmasının vacib olduğunu düşünürəm".

Şərqi Qara Dəniz İxracatçıları Birliyinin rəhbəri və Trabzon Ticarət Palatasının prezidenti Erkut Çələbi vurğulayıb ki, ticarət gəmilərinə hücumlar artıq təcrid olunmuş hadisələr hesab edilə bilməz:

"Yalnız mülki məqsədlər üçün istifadə edilən və ölkələr arasında kommersiya yükləri, əsasən qida məhsulları daşıyan gəmilərin və gəmidəki dənizçilərin hədəfə çevrilməsi qətiyyən qəbuledilməzdir".

Süleyman