Həm də xalqlar arasında dostluq, dinlərarası anlaşma və mədəniyyətlərarası dialoqun canlı elçisi kimi qəbul oluna bilər

İsrailin Azərbaycandakı yeni fövqəladə və səlahiyyətli səfiri Ronen Krausz ölkəmizə gəlişi ilə diplomatiyanın yalnız rəsmi protokoldan ibarət olmadığını, həm də xalqlar arasında mənəvi körpülər yaratmaq missiyasını daşıdığını nümayiş etdirdi. Onun ilk addımlarından bəlli oldu ki, məqsədi yalnız dövlətlərarası münasibətləri inkişaf etdirmək deyil, həm də Azərbaycan xalqının ruhunu, tarixini, şəhidlərini və mədəniyyətini dərindən duymaqdır.
Səfir Ronen Krausz yalnız yəhudi dini icmalarının liderləri ilə deyil, eyni zamanda pravoslav, katolik və digər dini konfessiyaların rəhbərləri ilə görüşərək, Azərbaycanın əsrlərlə formalaşmış dinlərarası harmoniyasına xüsusi önəm verdiyini göstərdi. Bu görüşlər bir daha təsdiqlədi ki, Azərbaycan unikal tolerantlıq modelinə malikdir və Krausz bu modelə böyük dəyər verir.

Səfirin Qubaya səfəri, Qırmızı Qəsəbədə icmalarla görüşü, Dağ Yəhudiləri Muzeyinə baş çəkməsi onun diplomatiyanı mənəvi dialoq üzərində qurduğunu göstərdi.

Xüsusilə Fəxri Xiyabanı ziyarət edərək, Azərbaycanın ümummilli lideri Heydər Əliyevin və görkəmli oftalmoloq, professor Zərifə Əliyevanın məzarları üzərinə gül dəstələri qoyması, səfirin Azərbaycan tarixinin böyük şəxsiyyətlərinə ehtiramının təzahürü idi.

Bundan sonra Şəhidlər Xiyabanında Vətən uğrunda canından keçənlərin xatirəsini yad etməsi və Azərbaycanın yəhudi əsilli Milli Qəhrəmanı Albert Aqarunovun məzarını ziyarət etməsi həm Azərbaycan xalqına, həm də yəhudi icmasına mənəvi bağın dərinliyini göstərdi.

Səfirin Azərbaycan Dillər Universiteti və digər ali təhsil müəssisələri ilə qurduğu əlaqələr gələcəyə yönəlmiş strateji baxışın nümunəsidir. Elm və təhsil üzərində qurulan dialoq gələcək nəsillərə təsir edən ən güclü diplomatik investisiyadır.

Səfir Ronen Krauszun Azərbaycana enişdə milli geyimdə görünməsi isə sıradan bir jest deyildi, bu, Azərbaycan xalqının milli-mənəvi dəyərlərinə ehtiramın bariz göstəricisi idi. Diplomatiya sözlərdən çox, simvollarla danışır, və Krausz bu dildə yüksək ustalıqla danışdı.

Magen David Azərbaycan adindan səfir Ronen Krausza Azərbaycanda yeni başlamış fəaliyyətində uğurlar arzulayırıq. Eyni zamanda arzumuz budur ki, onun fəaliyyəti nəticəsində Azərbaycan vətəndaşları İsrailin və ümumilikdə yəhudi xalqının mədəniyyəti, həyat dəyərləri və mənəviyyatı ilə daha yaxından tanış olsunlar. Bu baxımdan səfirin ölkəmizdə daha da aktiv fəaliyyət göstərməsini səmimi qəlbdən arzu edirik.

Beləliklə, Ronen Krausz Azərbaycanda yalnız İsrailin diplomatik təmsilçisi deyil, həm də xalqlar arasında dostluq, dinlərarası anlaşma və mədəniyyətlərarası dialoqun canlı elçisi kimi qəbul oluna bilər!



David Seliverstov

Magen David Azərbaycan İnsan Hüquqları Müdafiə Mərkəzinin rəhbəri