"30 Avqust Türkiyə tarixində ən şanlı günlərdən biri - Zəfər bayramıdır. 1922-ci il avqustun 30-da Türkiyə ordusu Mustafa Kamal Atatürkün komandanlığı altında Qurtuluş savaşında Dumlupınarda zəfər qazanaraq ölkənin cənub-qərbini yunan işğalından azad etdi".

Newscenter.az xəbər verir ki, bunları deyən Azərbaycanlıların və digər Türkdilli Xalqların Əməkdaşlıq Mərkəzi İB-nin sədri İlham İsmayılov bildirib ki, Türkiyəni bu şanlı zəfərə və Cümhuriyyətə aparan yol çox çətin və mürəkkəb olsa da, bu savaş Anadolu torpaqlarının "Türk Vətəni" olduğunu bir daha dünyaya və Qərb müttəfiqlərinə sübut etdi:

"1920-ci ildə Paris yaxınlığındakı Sevr şəhərində müttəfiq Qərb dövlətləri (Britaniya, Fransa, ABŞ) tərəfindən içzalanmış saziş ləğv edildi.

Bir il sonra, 1923-cü il oktyabrın 29-da Mustafa Kamal paşa Türkiyə Cümhuriyyətini elan etdi. Avqustun 30-u həmçinin Türkiyə Silahlı Qüvvələri Günü kimi qeyd olunur".

İlham İsmayılov qeyd edib ki, Türk milləti və onun müzəffər vətənsevər, millətsevər, qüdrətli ordusu tarix boyu xalqının azadlığı və istiqlaliyyəti uğrunda daim mübarizə apararaq, savaşlara qatılmış və bütün savaşları qazanmışdır. Türkiyə bu zamana qədər Vətəni və torpağı uğrunda yüz minlərlə şəhid vermiş, demokratiyanı, humanizmi, bəşəri dəyərlərini daim qoruyub saxlamışdır:

"Türkiyə Cümhuriyyətinin 30 Avqust Zəfər Bayramını səmimi duyğularla təbrik edirəm.
Tanrı Türkü qorusun!".