"Dünən ölkəmizdə fəaliyyət göstərən siyasi partiya sədrlərinin Cəbrayıl və Zəngilan rayonlarına səfəri baş tutub. Əvvəlcə Horadiz şəhərinin yaxınlığında Azərbaycan Respublikasının Minatəmizləmə Agentliyinin fəaliyyəti barədə məlumat aldıq. Düşmən tərəfindən basdırılmış minaların zərərsizləşdirilməsi prosesini izlədik. Minatəmizləmə ilə məşğul olan qəhrəman oğullarımızla qürur duyduq. Partladılan minanın dalğası və səsi, həqiqətən də qorxunc idi".

Newscenter.az xəbər verir ki, bu fikirləri Ədalət Partiyasının sədri Mütəllim Rəhimli Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin rəhbərliyi ilə partiya sədrləri, millət vəkilləri, politoloqlar, internet telekanallarının rəhbərləri və digər media mənsublarının iştirakı ilə baş tutan səfərin təəsüratlarını bölüşərkən səsləndirib. Partiya sədri deyib ki, səfər zamanı Cəbrayıl şəhərinin yenidən qurulması prosesi ilə tanış olublar:

"Bir tərəfdə 4-5 mərtəbəli müasir və olduqca göz oxşayan binalar və elə onun yanındaca ermənilərin vəhşi kimi dağıtdığı evləri görəndə insanda hərtərəfli qənaət hasil olur. Kimin kim olduğu bilinir. Cəbrayıllılar demək olar ki, kütləvi şəkildə bizmlə görüşə axışdılar. İnsanlar hisslərini, həyacanlarını, sevinclərini bölüşürdülər. Bu xoşbəxtliyi çoxaltmaq üçün onu paylaşmaq lazımdır, axı.

Cəbrayılda yerləşən “Araz Vadisi İqtisadi Zonası” Sənaye Parkı isə işğaldan azad edilmiş ərazidə məskunlaşan sakinlərin yaxın gələcəkdə işlə təmin olunması üçün böyük ümidlər yaradır. İlkin nəticələr də var".

Mütəllim Rəhimli qeyd edib ki, sonra Zəngilanın Məmmədbəyli kəndi, Zəngilan şəhər məscidi, Zəngilan Konqres Mərkəzi, 104 mənzilli yaşayış kompleksi və Oxçuçay üzərində yerləşən “Zəngilan” SES-ə baxış keçirmək, görülən işlərlə tanış olmaq imkanı əldə ediblər:

"Zəngilan şəhərinin tikiləcəyi ərazini gördük. İndi burada məscid və konqres mərkəzi tikilib, məktəb və bir neçə binanın isə əsası qoyulub tikilməkdədir. Ermənilərin dağıtdığı və tövlə kimi istifadə etdiyi məscidimiz tarixi abidə kimi saxlanılıb, onun yanında isə sənət əsəri sayılacaq müasir məscid inşa olunub. İndi hər kəs məsciddə bu torpaqların azadlığı uğrunda şəhid olanların ruhuna dua, Allaha isə şükür etmək imkanına malikdir. Sanki ilkin olaraq burada məscidin tikilməsinin də məhz mənası budur".

Partiya sədri hesab edir ki, işğaldan azad edilmiş ərazilərdə görülən işlərlə yaxından tanış olmaq imkanı müxalifətin siyasi arenada həqiqi yerini tutması üçün yaxşı təşəbbüsdür:

"Çünki idarəetmədə iqtidarla yanaşı müxalifət də iştirak edir. Bütün sivil ölkələrdə də müxalifət ölkədə baş verən proseslərin içərisində olur və ona bu şərait yaradılır. Bu səfər həm də siyasi müstəvidə dialoq mühitinin və qarşılıqlı anlaşmanın inkişafı üçün əhəmiyyətlidir. Buna görə təşkilatçılara təşəkkür edirəm".

Süleyman