Demək olar ki, hər gün efirlərdə qalmaqallı görüntülərin şahidi oluruq. Gənc və yaşlı müğənnilər arasında mahnılar üstündə dava gedir. Yüksək statusu, fəxri adları olan sənətçilərin böyük əksəriyyəti gənc müğənniləri hədəf alaraq onlara məxsus mahnıları ifa etməyə icazə vermirlər. Halbuki bəzən ifalar çox yaxşı alınır və cəmiyyət tərəfindən müsbət qarşılanır. Paxıllıq, gözü götürməmə, daxili aləmin qaranlıq olması, mənəviyyatın kasadlığı adından, statusundan və mövqeyindən asılı olmayaraq bir sıra insanları rəzil vəziyyətə salır. Bunlara tanınmış sənətçilər də daxildir. Azərbaycan mədəniyyətinin, musiqisinin inkişafından söhbət gedirsə gələcək üçün yüksək istedada malik sənət adamlarının yetişməsi mütləq vacibdir. Belə olan halda böyüklər, sənətdə uzun yol qət etmiş insanlar gənclərə əllərindən gələn qədər dəstək olmalıdırlar. Təəssüf ki, biz daha çox əksini görürük.

Şou-biznesdə gənc, istedadlı müğənnilərə daim dəstək olan, öz mahnılarının, şedevr əsərlərinin gənc müğənnilər tərəfindən ifasına icazə verən ustad müğənnilərdən biri və birincisi xalq artisti, dahi sənətkar Niyaməddin Musayevdir. Hər kəs bilir ki, adıçəkilən sənətkar həmişə gənclərin yanında olduğunu dəfələrlə sübuta yetirib, cəmiyyətə göstərib. Niyaməddin Musayevin kəsintisiz və davamlı olaraq gündəmdə olması, mahnılarının, əsərlərinin hər zaman aktual olması onun sənətinin, ürəyinin, xarakterinin və mənəviyyatının böyük olması ilə sıx bağlıdır.

Düşünürəm ki, bəzi müğənnilər məhz xalq artisti Niyaməddin Musayevdən bir çox məsələlərdə nümunə götürüb həyat və fəaliyyətlərinə tətbiq etsələr yaxşı olar!

Anar Salehoğlu,
İctimai-siyasi fəal