Bir sıra hallarda bu və ya digər məhkəmənin çıxardığı qərar icra edilmir ki, bu da nəticə etibarilə müəyyən problemlərin meydana çıxmasına səbəb olur.

Newscenter.az-ın xəbərinə görə, məhkəmə qərarlarının icra olunmamasından danışan Azərbaycan Vəkillər Kollegiyasının üzvü, hüquqşünas Vəfa Qədirova deyib ki, Azərbaycan Respublikası Cinayət Məcəlləsinin 306-cı maddəsinə əsasən qanuni qüvvəyə minmiş məhkəmə qətnaməsini, hökmünü, qərardadını, qərarını və ya əmrini qərəzli olaraq icra etməmə və ya həmin məhkəmə aktlarının icrasına maneçilik törətmə- 2000 min manatdan 4000 min manatadək miqdarda cərimə və ya 320 saatdan 480 saatadək ictimai işlər və ya 2 ilədək müddətə islah işləri və ya 3 ilədək müddətə azadlığın məhdudlaşdırılması və ya eyni müddətə azadlığın məhdudlaşdırılması və ya 3 ilədək müddətə azadlıqdan məhrumetmə ilə cəzalandırılır.

Onun sözlərinə görə, eyni əməllər vəzifəli şəxs tərəfindən törədildikdə 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə 5000 min manatdan 7000 min manatadək miqdarda cərimə nəzərdə tutulur:

"Eyni zamanda 2 ilədək müddətə islah işləri və ya 3 ildən 5 ilədək müddətə azadlığın məhdudlaşdırılması və ya 3 ilədək müddətə azadlığın məhdudlaşdırılması və ya 3 ildən 5 ilədək müddətə azadlıqdan məhrumetmə ilə cəzalandırılır".

Anar Əliyev