"1972-ci ildə Sovetlər tərəfindən Venera planetinə göndərilmək üçün buraxılan Kosmos 482 adlı kosmik aparat orbitdən çıxa bilmədiyi üçün 53 ildir Yer ətrafında fırlanır. Bu günlərdə isə – mayın 9-dan 11-dək – onun Yer atmosferinə nəzarətsiz şəkildə daxil olacağı gözlənilir".

Newscenter.az-ın xəbərinə görə, bunu deyən tarixçi Rəfael Eminov bildirib ki, aparatın 495 kq-lıq eniş modulu titan materialından hazırlandığı üçün tam yanmadan Yerə çata bilər:

"Maraqlısı odur ki, düşə biləcəyi coğrafi zolaq 52° şimal və cənub en dairələri arasında yerləşir ki, bu zonaya Azərbaycan da daxildir.

Panikaya ehtiyac yoxdur! Əvvəlki təcrübələr göstərir ki, belə obyektlərin insanlara və infrastruktura zərər vermə ehtimalı çox aşağıdır. Çox zaman ya okeanlara, ya da az əhalili bölgələrə düşürlər".

Bəs belə halda nə etmək lazımdır?

Tarixçi deyir ki, əgər səmanın parlaq cismi və ya düşmə hadisəsi müşahidə olunarsa, ona yaxınlaşmaq olmaz:

"Dərhal müvafiq orqanlara məlumat verin! Elmi və texnoloji prosesləri izləyək, amma həmişə ehtiyatı əldən verməyək!".

Anar Əliyev