Ümumdünya İnsan Alverinə Qarşı Mübarizə Günü münasibətilə iyulun 30-dan avqustun 30-dək “Repatriasiya” adlı xeyriyyə aksiyası keçiriləcək.Bu barədə Miqrasiya Agentliyinin mətbuat xidmətindən məlumat verilib.
Kampaniyanın məqsədi xarici ölkələrdə ağır şəraitdə qalmış Özbəkistan vətəndaşlarını öz vətənlərinə qaytarmaq və onları psixoloji, sosial və iqtisadi cəhətdən adaptasiya etməkdir.
Qeyd olunur ki, ilk növbədə Türkiyə, Rusiya, Qazaxıstan, Birləşmiş Ərəb Əmirlikləri, Səudiyyə Ərəbistanı, Hindistan, ABŞ və Cənubi Koreyada deportasiya mərkəzlərində saxlanılan qadın və uşaqlar geri qaytarılacaq.
Avqustun 1-də keçirilən müşavirədə kampaniyanın səmərəli təşkili ilə bağlı tapşırıqlar verilib. O cümlədən, səfirlik və konsulluqlar avqustun 7-dək xarici ölkələrin deportasiya mərkəzlərində olan Özbəkistan vətəndaşlarını müəyyənləşdirəcək və siyahını Miqrasiya Agentliyinə təqdim edəcəklər.
Avqustun 15-dək şəxsi məlumatları yetərli olmayan şəxslər üçün lazımi sənədləri hazırlayıb ikinci siyahını agentliyə göndərəcəklər. Miqrasiya Agentliyi təqdim olunan siyahı əsasında 1-3 iş günü ərzində təyyarə biletlərini alacaq.
Vətəndaş birbaşa Miqrasiya Agentliyinə müraciət edərsə, qurumun əməkdaşları 1-2 saat ərzində onlarla əlaqə saxlayaraq sənədləri məsafədən qəbul edəcəklər. Müraciətə 1 gün ərzində baxılacaq və 2 gün ərzində bilet təqdim olunacaq.
Müraciət etmək üçün Miqrasiya Agentliyinin xaricdəki nümayəndəlikləri, Özbəkistanın xaricdəki nümayəndəlikləri və konsulluq müəssisələri @legal_assistance_uzbot ilə əlaqə saxlaya və ya 12-82 qısa nömrəsinə zəng edə bilərsiniz.