“Özbəkistanda bir qrup Fələstin vətəndaşına dövlət qayğısı və mərhəmət prinsipləri əsasında dəstək sisteminin yaradılması ilə bağlı tədbirlər haqqında” prezident fərmanı qəbul edilib.
Fərmanla fələstinli xəstələrin və onları müşayiət edən şəxslərin Özbəkistanda həyata adaptasiyası prosesinə yardım üzrə Respublika Komissiyasının tərkibi təsdiq edilib.
Fərmana əsasən, əlilliyə səbəb olan xəstəliklərlə Özbəkistana gətirilən Fələstin vətəndaşları (qonaqlar) qanunla müəyyən edilmiş müalicə müddətindən asılı olmayaraq əlil kimi tanınacaqlar.
Qonaqlara lazımi iş təcrübəsi olmayan yaşlı vətəndaşlar üçün pensiya təyin ediləcək.
Həmçinin əmək qabiliyyətli yaşda olan hər bir qonaq üçün minimum istehlak xərcləri məbləğində aylıq yaşayış müavinəti tətbiq ediləcək.
Hər bir qonaq ailəsinə yaşayış yerində mənzil kirayəsi xərcləri ödəniləcək.
Sərəncama əsasən, qonaqların hər bir ailəsinə ilkin tələbat mallarının (ailədə istifadə olunan qeyri-ərzaq məhsullarının dəsti) alınmasına görə birdəfəlik müavinət ödəniləcək.
Qonaqların ailə üzvlərinə şəxsi müşayiət və fərdi dəstək göstərmək üçün məhəllədən 1 sosial işçi təyin olunacaq.
Onların övladları dövlət məktəbəqədər təhsil müəssisələrinə və yaşadıqları yer üzrə məktəblərə yerləşdiriləcək.
Qonaqlar 2028-ci il yanvarın 1-dək dövlət məktəbəqədər təhsil müəssisələrində uşağa qulluq üçün valideyn ödənişlərindən azad ediləcəklər.
Onların övladları dövlət məktəbəqədər təhsil təşkilatlarına və məktəblərə növbəyə verilmədən, “İnson” mərkəzlərinin müraciəti əsasında yerləşdiriləcək.
Qonaqlar yaşadıqları ünvana uyğun olaraq ailə həkimi məntəqələrində, ailə poliklinikalarında, rayon (şəhər) çoxsahəli mərkəzi poliklinikalarda qeydiyyata alınacaqlar.