Cənubi Koreya parlamenti məktəblərdə dərs saatlarında mobil telefon və ağıllı cihazlardan istifadəni qadağan edən qanun layihəsini qəbul edib.

Newscenter.az “The Korea Herald” qəzetinə istinadən bildirir ki, Milli Assambleyada iştirak edən 163 üzvdən 115-i qanun layihəsinin lehinə səs verib.

Yeni qanuna əsasən, əlillik, xüsusi ehtiyaclar və fövqəladə hallarda istifadə istisna olmaqla, tələbələr dərs saatlarında mobil telefon və smart cihazlardan istifadə edə bilməyəcəklər.

Qanun 2026-cı ilin martında başlayan yeni tədris ilindən qüvvəyə minəcək.

Cənubi Koreya Təhsil Nazirliyinin məlumatına görə, ölkə əhalisinin təxminən dörddə biri telefondan hədsiz dərəcədə asılıdır. 10-19 yaşlı gənclər arasında bu nisbət 43 faizə yüksəlir və araşdırmalar göstərir ki, gənclərin üçdə birindən çoxu sosial mediada keçirdikləri vaxta nəzarət etmək üçün mübarizə aparır.

Anar Əliyev