Newscenter.az.24.12.2020. Azərbaycanda tütün yarpağının yığımı yekunlaşmaq üzrədir. Fermerlər indiyə qədər 6 936 ton tütün yığıb, qəbul məntəqələrinə 6 520 ton quru tütün təhvil verib.

Bu barədə Newscenter.az-a Kənd Təsərüffatı nazirliyindən bildirilib.

Məlumata görə, tütünçü fermerlər tərəfindən aqrotexniki qulluq qaydalarına düzgün riayət edilməsi, şitil seçimi bu il orta məhsuldarlıq göstəricisinin yüksəlməsinə səbəb olub.

Ötən ilin yekununda tütünçülükdə yekun orta məhsuldarlıq 19,3 sentner olub. Bu il yığım prosesi tam yekunlaşmasa da, orta məhsuldarlıq ötənilki göstəricidən yüksəkdir. Hazırda tütün yarpağı üzrə orta məhsuldarlıq 22,1 sentner təşkil edir ki, bu da ötənilki göstəricidən 2,8 sentner çoxdur. Orta məhsuldarlıq göstəricisinin mövsümün sonunda daha da artacağı gözlənilir.

Qeyd edək ki, bu il Azərbaycanda 3 144 hektar sahədə tütün əkilib, 3 141,5 hektar sahədə bitiş alınıb. 2020-ci ildə Azərbaycanın 12 rayonunda və Naxçıvan MR-da tütün əkilib. Əkin sahələrinin yarıdan çoxu ənənəvi tütünçülük bölgələrindən olan Şəki, Qax və Oğuz rayonlarının payına düşür. 2020-ci ildə Şəkidə 1 108 hektar, Qaxda 496,5 hektar, Oğuzda isə 269 hektar sahədə tütün əkilib.

Tütün üzrə orta məhsuldarlıq Şəkidə 34,4 sentner, Qaxda 15,3 sentner, Oğuzda 20,4 sentner təşkil edir. Zaqatala, Balakən, Qəbələ, Tovuz, İsmayıllı, Goranboy, Lerik, Masallı və Yardımlı rayonlarında da fermerlər sahələrdən bol məhsul götürüblər.

Qeyd edək ki, ölkədə tütünçülüyün inkişafı dövlət tərəfindən dəstəklənir. Dövlət dəstəyi mexanizmlərinin genişləndirilməsi tütünçülüyün inkişafını stimullaşdırır. Tütün həm əkin, həm məhsul subsidiyası verilən kənd təsərrüfatı bitkiləri kateqoriyasına daxildir. Fermerlər tütün əkilmiş sahələrin hər hektarına görə dövlətdən 280 manat subsidiya alırlar. Bundan başqa, fermerlərə qəbul məntəqələrinə təhvil verilən quru tütünün hər tonuna görə 50 manat, yaş tütünün hər tonuna görə isə 5 manat məhsul subsidiyası ödənilir.

Tədarükçülər fermerlərdən təhvil aldıqları tütün məhsulu ilə bağlı məlumatları, o cümlədən alqı-satqı müqavilələrinin və qəbzləri Elektron Kənd Təsərrüfatı İnformasiya Sisteminə daxil edirlər. Məlumatlar yoxlanıldıqdan sonra müvafiq subsidiya məbləğləri fermerlərin kartlarına köçürülür.

Hazırda sahələrdə yığım davam edir, yığım prosesinin yaxın günlıərdə başa çatması gözlənilir.

Orxan