Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Elektron Hökumətin İnkişafı Mərkəzinin (EHİM) direktoru Fariz Cəfərov Qlobal Hökumət Forumu (Global Government Forum) tərəfindən təşkil olunan vebinarda çıxış edib. Vebinar “Məlumatların inteqrasiyası və dövlət sektoru standartlarının qorunması” mövzusuna həsr olunub.
Newscenter.az xəbər verir ki, vebinarın əsas məqsədi pandemiya zamanı müxtəlif ölkələrin məlumatların toplanması, saxlanması və böhranın aradan qaldırılması məqsədilə təcrübələri öyrənmək və bu təcrübələrin gələcəkdə bütün bizneslərə tətbiqini nəzərdən keçirməkdir.
Fariz Cəfərov “ASAN xidmət” tərcrübəsi, Azərbaycanda rəqəmsal hökumətin inkişafı istiqamətində görülən işlərdən danışıb. Dövlət xidmətlərinin göstərilməsində məlumat mübadiləsinin həyata keçirilməsi məqsədilə yaradılmış “ASAN Bridge” milli məlumat mübadiləsi sistemi, dövlət qurumları arası məlumatların rəqəmsal formada ötürülməsi haqqında iştirakçılara geniş məlumat verilib. Təqdimat zamanı, həmçinin “ASAN Finans” layihəsi çərçivəsində özəl sektorda vətəndaşlara xidmətlərin göstərilməsi və vətəndaş rahatlığının təmin edilməsi üçün məlumatların ötürülməsindən bəhs edilib. EHİM-in daha bir rəqəmsal həlli - vətəndaşların dövlət xidmətlərinə əlçatanlığının təmin olunması məqsədilə mərkəzləşdirilmiş identifikasiya aləti olan “ASAN Login” layihəsinin əhəmiyyəti diqqətə çatdırılıb.
Sonra Azərbaycanda pandemiya dövründə böhran vəziyyətinə rəqəmsal həllərlə cavab reaksiyası, vəziyyətin idarə edilməsi məqsədilə ərsəyə gətirilmiş rəqəmsal layihələr, mobil tətbiqlər, data mübadiləsi və inteqrasiyalar haqqında danışılıb. Görüşün sonunda Mərkəz və “ASAN xidmət” tərəfindən yaradılan və vətəndaşların rahatlığını təmin edən digər layihələr haqqında məlumat verilib.
Vebinarda, həmçinin dövlət sektorunda məlumat mübadiləsində yaranan maneələr, pandemiya dövründə həmin maneələrin öhdəsindən gəlməklə elektron xidmətlərin təmin edilməsi, Böyük Britaniya hökumətinin milli məlumat strategiyası kimi təşəbbüslərin məlumat mübadiləsinin sürətli təmin olunmasında rolu və digər bu kimi mövzulara toxunulub.
Qlobal Hökumət Forumu bütün ölkələrdən olan dövlət qulluqçuları üçün təcrübə, bilik və əlaqələr qurmağa, eləcə də onların müasir qlobal çağırışlara cavab verməsinə dəstək göstərərək müxtəlif tədbirləri, nəşrləri və tədqiqatları özündə birləşdirir. Forum dövlət sektorunda çalışan liderlərin üzləşdikləri çətinliklərin öhdəsindən gəlmək üçün alətləri və innovasiyaları müəyyən etməklə onlara kömək edir, hansı təcrübələrin işlədiyi və hansılarının işə yaramadığı barədə fikir mübadiləsi apara bilmək üçün mühit və platforma təmin edir.
Sevinc
